Aravot.am-ն անդրադարձել է «Դարմ» ՍՊ ընկերության տնօրեն Մարատ Օգանեզովի քրեական գործին:
Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանի դատավճռով Մարատ Օգանեզովը դատապարտվել էր երեքուկես տարվա ազատազրկման:
Վերքննիչ բողոքով ՀՀ քրեական եւ զինվորական վերաքննիչ դատարան էր դիմել Օգանեզովի պաշտպանը` ՀՀ փաստաբանների պալատի անդամ Լիաննա Գրիգորյանը (լուսանկարում):
Հիշեցնենք, որ Մարատ Օգանեզովը զբաղվել է ֆուրշետների կազմակերպմամբ: Նրա «Դարմ» ՍՊ ընկերությունը գրանցված է եղել հարկային մարմիններում: Օգանեզովը, ըստ մեղադրանքի կողմի, խուսափել էր կատարել հարկային պարտավորությունները, կանխամտածված ստեղծել է անվճարունակության հատկանիշներ եւ պետությանը պատճառել էր 12.182.000 ՀՀ դրամի վնաս: Մ. Օգանեզովի նկատմամբ ընտրվել էր ստորագրություն քաղաքից չբացակայելու մասին: Նա իրեն մեղավոր չէր ճանաչել կանխամտածված սնանկության գործողություններ կատարելու եւ հարկերից խուսափելու համար:
Մինչ վերաքննիչ բողոքի քննությունը, Մարատ Օգանեզովը փակել էր վնասը, վերականգնել պետությանը հասցված վնասը:
Այսօր ՀՀ քրեական եւ զինվորական գործերով վերաքննիչ դատարանը Ս. Չիչոյանի նախագահությամբ ավարտեց վերաքննիչ բողոքի քննությունը, եւ պայմանական ազատազրկման դատապարտեց Մարատ Օգանեզովին, պատիժը չի կիրառվի, նրա համար կիրառվեց երկու տարվա փորձաշրջան:
