Կրկին ժամանակն է լիցքաթափվելու ու երիտասարդների մտքերին ծանոթանալու: Օրվա նախադասությունը սկսում ենք այսպես՝ «Ամեն ինչ կատարյալ կլիներ, եթե…». շարունակում են երիտասարդները:
«Ամեն ինչ կատարյալ կլիներ, եթե երկրում ժողովրդավարություն լիներ», – ասում է 23-ամյա Միքայելը:
20-ամյա Արսենի համար էլ կատարելությունն այլ բնույթ ունի. «Ամեն ինչ կատարյալ կլիներ, եթե չլիներ դավաճանությունը, խաբկանքն ու կեղծավորությունը», – ասում է նա:
«Ամեն ինչ կատարյալ կլիներ, եթե մարդիկ ձգտեին այդ կատարելությանը, – կարծում է 22-ամյա Սոֆին, – բայց միևնույն ժամանակ ասում են, թե կատարյալը դադարում է այդպիսին լինել, եթե այն ձեռք է բերվում»:
Շատերը մեջբերեցին նաև Սալվադոր Դալիի հայտնի տողերը. «Մի վախեցեք կատարելությունից, միևնույն է, դուք դրան չեք հասնի»:
«Ամեն ինչ կատարյալ կլիներ, եթե լիներ հավատ, հավատ երազանքների ու ցանկությունների իրականացման հանդեպ», – կարծում է 18-ամյա Իրինան:
20-ամյա Հրայրի համար էլ կատարելությունը անձնական երջանկությունն է, ասում է. «Ամեն ինչ կատարյալ կլիներ, եթե նա չմերժեր ինձ»:
«Ամեն ինչ երբեք էլ չի կարող կատարյալ լինել, – կարծում է 21-ամյա Մարգարիտան, -քանզի կատարելության ոչինչ ու ոչ ոք հասնել չի կարող»:
Տիգրանուհի Թասլակյան
