Այսօր ԵՊՀ-ում «Հանրային կապեր» եւ ԶԼՄ-ների հետ հաղորդակցություն» մագիստրոսական ծրագրի առաջին շրջանավարտների ավարտական ատենախոսությունների պաշտպանությունն էր: Թեմաները բազմազան էին՝ «PR մասնագետի հաղորդակցական հմտություններ»-ից մինչեւ «Հանրային կապերի ոլորտում կրթական հիմնախնդիրները»:
ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանն Aravot.am-ի հետ զրույցում նշեց, որ 2011-2012 ուսումնական տարվանից Երեւանի պետական համալսարանի ժուռնալիստիկայի ֆակուլտետում այս ծրագրի մեկնարկը պայմանավորված էր այն իրողությամբ, որ ոչ միայն Հայաստանում, այլեւ ամբողջ աշխարհում PR ոլորտի լուրջ անհրաժեշտություն է զգացվում: Ինչ վերաբերում է մայր բուհին, դեկանի խոսքով, իրենք խնդիրը լուծել են հետեւյալ կերպ. ճշտել են, թե PR ոլորտում ինչ մասնագետներ կան, եւ ովքեր կարող են մանկավարժական գործունեություն ծավալել: «Այսպիսով ընտրեցինք մարդկանց, ովքեր մասնակից եղան PR ոլորտի մասնագետների պատրաստմանը: Ես կարծում եմ, որ թե՛ լրագրությունը, թե՛ PR ոլորտը, եւ էլի որոշ ոլորտներ մեծապես պետք է համագործակցեն դաշտում գործող պրոֆեսիոնալների հետ: Այդ սկզբունքով աշխատելով՝ մենք այս տարի ունենք առաջին ՝ 17 շրջանավարտները: Ի դեպ, բավական ընդգրկուն է մագիստրոսական թեզերի թեմաների շրջանակը»,- ասաց պարոն Մարտիրոսյանը:
Հետաքրքրվեցինք՝ ինչ տպավորություն է ստացել շրջանավարտների աշխատանքների որակից, մատուցման ձեւից: «Որպես քննական հանձնաժողովի ամփոփիչ ատեստավորման հանձնաժողովի անդամ, արդեն չորրորդ պատասխանն եմ լսում: Կարծում եմ՝ բացառիկ հետաքրքիր պատասխաններ են՝ կազմակերպված, ներկայացման որակն ու խոսքի մշակույթն էլ հրաշալի»,-հայտնեց մեր զրուցակիցը:
Նաղաշ Մարտիրոսյանը նաեւ մտահոգություն հայտնեց. « 90-ական թվականներին Հայաստանում սկսվեցին ձեւավորվել մասնավոր բուհեր: Մասնավոր եւ ոչ միայն մասնավոր բուհերում, պայմանավորված լրագրողի մասնագիտության պահանջով, բացվեցվին ժուռնալիստիկայի, նույնիսկ միջազգային ժուռնալիստիկայի բաժիններ, որոնք հետագայում աստիճանաբար փակվեցին: Առաջատարը, ինչպես կար, մնաց Երեւանի պետական համալսարանի ժուռնալիստիկայի ֆակուլտետը: Հիմա էլ բազմաթիվ բուհեր սկսել են PR ոլորտի մասնագետներ պատրաստել, ինչի համար ուրախ եմ, բայց նաեւ ներքին համոզումն ունեմ, որ դաշտում այդքան ուսուցիչ չունենք: Ուսուցչի դերը կարեւորելով՝ ուզում եմ մտահոգությունս հայտնել. եթե չունենք ուսուցիչներ, ուրեմն ո՞վ է նրանց ճանապարհում, ո՞վ է տալիս անհրաժեշտ գիտելիքներ: Սա խնդիր է, որը պետք է կարեւորել»: ԵՊՀ ժուռնալիստիկայի ֆակուլտետի դեկանը համոզված է, որ ժամանակն է, որ լրագրություն եւ PR ուսուցանողները մի համաժողովի շրջանակում հավաքվեն, ամփոփեն արդեն արվածը եւ հետագա անելիքները, որովհետեւ ոլորտում լուրջ փոխգործության անհրաժեշտություն կա:
Կարդացեք նաև
Գոհար ՀԱԿՈԲՅԱՆ
