Ինչո՞ւ ընտրվեց հենց ՀՀ վաստակավոր արտիստուհի Լեյլա Սարիբեկյանը՝ Հ. Պարոնյանի «Բաղդասար Ախպար» օպերետում Անուշի դերը խաղալու համար:
Այսօր «Նոյյան Տապան» լրատվական կենտրոնում այս հարցին պատասխանելով՝ «Բաղդասար Ախպար» օպերետի բեմադրիչ, կոմպոզիտոր Հրանտ Աղաջանյանն ասաց. «Մեզ ոչ միայն պետք էր դերասանուհի, այլ՝ հրաշալի վոկալ տվյալներով երգչուհի: Ինձ հարկավոր էր, որ Անուշը լիներ սպիտակամորթ, բարձրահասակ»,- նշեց օպերետի բեմադրիչը՝ նկատելով, որ շատ կարեւոր էր, որ Անուշի դերակատարը թեկուզ մազերի հաշվին, ունենար նաեւ մեծ գլուխ:
«Ամբողջ կյանքում երազել եմ Տիգրանյանի «Անուշը» երգել: Ինչեւէ, կարող եմ ասել, որ ինչ-որ չափով երազանքս իրականացավ»,-անկեղծացավ Լեյլա Սարիբեկյանը:
Նրա խոսքով՝ Անուշի դերը բավականին հակասական է, քանի որ Անուշը եւ ամուսնացած է եւ միաժամանակ սիրեկան ունի:
Կարդացեք նաև
«Իսկապես անմարդկային ճիգեր օգտագործեցի, եւ եթե չլիներ կենդանի երգելու փորձը, չէի կարողանա հաղթահարել»,- խոսելով օպերետի պրեմիերայից ստացած իր տպավորություններից՝ ասաց երգչուհին:
«Բաղդասար Ախպար» օպերետի հովանավոր, ամերիկահայ գործարար Վահագն Հովնանյանի խոսքով, իր նպատակն է արվեստի միջոցով հայ ժողովրդին համախմբել:
«Շատ մեծ ներկայացում է, նորություն է Հայաստանի համար, ողջ հայության համար: Կմաղթեմ, որ բոլորդ միասնական լինեք»,- ասաց բարեգործը:
Աշոտ ԱԹԱՅԱՆ
