ՀԱԿ-ը դա գնահատում է խոստումների դրժում եւ ՀՀԿ-ին մեղադրում՝ Մարտի 1-ի համար
Այսօր ԱԺ-ն մերժեց ՀԱԿ-ի նախաձեռնությունը՝ Մարտ 1-ի հարցերով ժամանակավոր հանձնաժողով ստեղծելու: Սա այն դեպքում, երբ ընտրություններից առաջ խորհրդարանական մեծամասնությունը ԶԼՄ-ների առջեւ երաշխիք էր տվել, որ եթե այդ հարցը հետաձգեն ընտրություններից հետո՝ իրենք կողմ կքվեարկեն:
Սակայն ՀՀԿ խմբակցության ղեկավար Գալուստ Սահակյանը այսօր հայտարարեց, որ այդ նախագիծը բազմիցս քննարկել են, բայց դեռեւս կան խնդիրներ. «Մենք օրինագծին դեմ ենք քվեարկելու»:
Գագիկ Ջհանգիրյանը արձագանքեց, որ քաղաքական մեծամասնության ներկայացրած առաջարկությունները եղել են թվով 7-ը, որոնցից 6.5-ն ընդունվել է. «Չի ընդունվել միայն այն առաջարկությունը, որի համաձայն ժամանակավոր հանձնաժողովը չպետք է իրավունք ունենար նիստերին հրավիրել քննիչների, հետաքննիչների, նրանց հարցեր ուղղել: Ի սկզբանե այդ կետից առաջարկվում էր հանել միայն դատախազներին: Բնականաբար, դատավորները մենք էլ չէինք նախատեսել: Ժամանակավոր հանձնաժողովներն իրավունք ունեն հրավիրել եւ լսել գործադիր իշխանության ներկայացուցիչներին»:
Կարդացեք նաև
ՀԱԿ խմբակցության ղեկավար Լեւոն Զուրաբյանը գնահատական տվեց ՀՀԿ-ի դիրքորոշմանը: Նա հիշեցրեց, որ ԱԺ-ում դեկտեմբերի սկզբին ՀՀԿ-ից ստացան հրապարակային երաշխիքներ, որ իրենք քվեարկելու են հօգուտ հանձնաժողովի ստեղծմանը .«Մենք գնահատում ենք սա որպես ձեր կողմից խոստումների, երաշխիքների դրժում: Այս քվեարկությունը լինելու է քվեարկություն, թե ով է պատասխանատու Մարտի 1-ի համար»:
Այնուամենայնիվ, նախագիծը չընդունվեց՝ 48 կողմ, 58 դեմ եւ 2 ձեռնպահ քվեարկության արդյունքներով:
Ուշագրավ է, որ Գագիկ Ծառուկյանը նախագծին կողմ է քվեարկել:
Հռիփսիմե ՋԵԲԵՋՅԱՆ
Սա էլ՝ ժողովրդի կողմից ընտրված ՀՀԿ-ն է, որը ցանկացած ընտրության՝ 58% է խփում, բայց ուզի՝
90 կխփի, ուզի՝80, ուզի՝ 70, ինչ ուզի այն էլ կխփի: