Մայիսի 5-17-ը Թուրքիայի Բոդրում քաղաքում կայացան «Miss 7 Continents -2013, Photomodel of the world, Littele miss world & little mister world-2013» գեղեցկության մրցույթները:
Aravot.am-ի հետ զրույցում «Համաշխարհային գեղեցկության եւ նորաձեւության լիգայի», «Միսս եւ Միստր աշխարհ» միջազգային կազմկոմիտեի նախագահ, մրցույթների հիմնադիր, հեղինակ Աշոտ Խաչատրյանը տեղեկացրեց, որ
«Miss 7 continents -2013»-ին մասնակցել է 21 գեղեցկուհի` տարբեր երկրներից, իսկ հաղթող է ճանաչվել Լատվիայի ներկայացուցիչ, «Miss world Latvia 2010» Ալիսա Միսկովսկան:
«Հզոր մրցույթ էր, մասնակցում էին «Miss World», ինչպես նաեւ «Miss Universe» մրցույթին մասնակցած աղջիկներ: Մրցույթն իր էությամբ հայկական ծագում ունի, քանի որ հեղինակը ես եմ»,-նշեց գեղեցկությունը աշխարհի տարբեր երկրներում «գովազդող» Խաչատրյանը՝ հավելելով, որ Հայաստանն այս մրցույթներում ներկայացրել է դերասանուհի, հաղորդավարուհի Զառա Վարդանյանն ու արժանացել «Best of the best» մրցանակին, մտնելով լավագույն յոթնյակի մեջ:
Խաչատրյանի փոխանցմամբ, մրցակցությունն ուժեղ է եղել, ժյուրին` հեղինակավոր:
Վերջինիս կազմում եղել են աշխարհահռչակ դիզայներներ, TV պրոդյուսերներ, երգիչներ: Նա նաեւ հավելեց, որ զերծ են մնացել քաղաքականությունից, այսինքն` ոչինչ չի քաղաքականացվել, մասնակիցներն ապահովված են եղել ամեն ինչով, իսկ մրցույթի պարուսույցը Անահիտ Գեւորգյանն է եղել:
Հաղթող աղջիկներին 10 օրվա անվճար ուղեգիր է տրվել եւ ընդհանուր 25 հազար եվրո արժողությամբ պայմանագիր կնքվել:
«Miss 7 Continents 2013»-ում գլխավոր մրցանակը ստացել է Լատվիայի ներկայացուցիչը, առաջին տեղը զբաղեցրել է Էստոնիայի, երկրորդը`Ռումինիայի, երրորդը`Կիրգիզիայի, իսկ չորրորդ տեղը` ազգությամբ հայ Ինեսսա Թադեւոսյանը, որը ներկայացրել է Կանադան:
«Photomodel of the world 2013»- ում էլ գլխավոր մրցանակին է արժանացել Հոլանդիայի ներկայացուցիչ Դեսիսլավա Նենկովան, հաջորդ տեղում` Ռուսաստանը ներկայացնող Եկատերինա Տրեգուբովան էր, ապա` Բելառուսը ներկայացնող Անաստասիա Պահռանիչնայան:
Ինչ վերաբերում է «Littele miss world & little mister world-2013»-ին, այստեղ Հայաստանը ներկայացրել են Մանանա Հովհաննիսյանն ու Հռիփսիմե Գալոյանը, վերջինս էլ ստացել է գլխավոր մրցանակը:
Մրցույթի դիզայներն ու ոճաբանը Դեինա Բրենտջեսն է եղել, իսկ իր բացառիկ ցուցադրությամբ մրցույթի ժամանակ ներկայացել` կոշիկների եւ հագուստի դիզայներ, ոճաբան հայազգի ELIZABETH F-ը:
Եվա ՀԱԿՈԲՅԱՆ
