«Արդեն 7-րդ տարին է Հայաստանը միանում է այս ակցիային եւ մեծ ուրախությամբ կարող ենք նշել, որ մեծ դինամիկա է նկատվում թանգարանների մասնակցության առումով»,- այսօր այս մասին «Զարկերակ» մամուլի ակումբում ասաց Թանգարանների միջազգային խորհրդի՝ ԻԿՕՄ-Հայաստան ազգային կոմիտեի տնօրեն՝ Անի Ավագյանը:
Բանախոսի փոխանցմամբ`ԻԿՕՄ-ը ստեղծվել է 1946 թվականին Ֆրանսիայում, որպես ՅՈՒՆԵՍԿՈ-ին կից թանգարանների գծով խորհրդատվական կոմիտե, ՄԱԿ-ում ունի թանգարանային գծով խորհրդատվական դեր. « 2005թ.-ին մասնակցող թանգարանների թիվն ընդամենը 9 էր, իսկ այս տարի Հայաստանից եւ Արցախից միացել են շուրջ 88 թանգարան: Այն ժառանգությունը, որը պահպանվում է թանգարաններում, պատկանում է ժողովրդին»,- ասաց Անի Ավագյանը:
Ռուսական արվեստի թանգարանի տնօրեն, Մշակույթի նախարարության ներկայացուցիչ Անուշ Տեր-Մինասյանը նշեց, որ այս տարի միջոցառումը կրում է «Թանգարանը ոչ ֆորմալ կրթության միջավայր» խորագիրը, սակայն ցանկությունը մեծ է, որ այն մեկօրյա բնույթ չի կրի. «Համակարգման դեպքում մենք շատ շուտով ականատես կլինեինք կրթված եւ ինտելեկտով բարձր հասարակության»:
Ըստ Տեր-Մինասյանի, եթե մարդը ցանկանում է գիտելիք ձեռք բերել, ապա թանգարան մեկ անգամյա այցով չպետք է բավարարվի. « Մեկ անգամ լինելով շատ բան չես սովորի»:
Կարդացեք նաև
Անի Ավագյանն անդրադառնալով թանգարանների կայքէջերին, ասաց, որ շատ քիչ թանգարաններ ունեն իրենք կայքէջը, քանի որ այն որոշակիորեն կապված է ֆինանսի հետ, սակայն շատ թանգարաններ պարզապես ունենում են իրենց էջը սոցիալական ցանցերում, որը եւս դրական է:
Քրիստինա ՄԻՐԶՈՅԱՆ
