Մայիսի 8-ից Նոյեմբերյանի քաղաքային մարզադաշտին կից գործում է հասարակական զուգարան: Նոյեմբերյան քաղաքը՝ Նոյեմբերյանի նախկին վարչական շրջանի կենտրոնը վաղուց կարիք ուներ հասարակական զուգարանի: Զուգարանում մուտքի վճարը մատչելի է` 50 դրամ, զուգարանը կառուցված է սանիտարական բոլոր կանոններին համահունչ: Հասարակական զուգարանը կառուցվել է «Քաունթերփարթ ինտերնեյշնլ» կազմակերպության ֆինանսական աջակցությամբ, ծախսվել է 8 միլիոն 698 հազար դրամ, որից համայնքի ներդրումը՝ 4 միլիոն 349 հազար դրամ:
Ապրիլի 4-ին Տավուշի մարզի առաջին ատյանի դատարանի դատավոր Աշոտ Խաչիկյանը մերժեց Նոյեմբերյան քաղաքի բնակիչ Սամվել Գիշյանի հայցը: Վերջինս հայցով Նոյեմբերյանի քաղաքապետարանից պահանջում էր քանդել քաղաքային մարզադաշտին եւ Սամվել Գիշյանին պատկանող հանդիսությունների սրահին հարակից տարածքում կառուցված հասարակական զուգարանի շինությունը եւ տարածքը բերել նախկին տեսքին: Դատարանը Ս. Գիշյանի հայցը մերժելու համար հիմք է ընդունել այն, որ հասարակական զուգարանը կառուցվել է համայնքին պատկանող հողատարածքում, առկա է համապատասխան նախագիծ, շինթույլտվություն, քաղաքապետարանի կողմից կառուցված հասարակական զուգարանը համապատասխանում է ՀՀ օրենսդրությամբ սահմանված նորմերին եւ պահանջներին, զուգարանի կառուցումը խիստ անհրաժեշտություն է քաղաքի բնակչության համար:
Ս. Գիշյանը պնդում է, որ նորակառույց հասարակական զուգարանի կոյուղագծի միացումը այդ տարածքում գործող բաց սելավատարին անօրինական է. առողջապահության նախարարի 2010թ. հոկտեմբերի 1-ի որոշմամբ մարդկանց զանգվածային կուտակման վայրերում հասարակական զուգարաններ տեղակայվում են հասարակական եւ բնակելի շինություններից առնվազն 50 մ հեռավորության վրա, նորակառույց զուգարանը գտնվում է քաղաքի մշակույթի տան եւ հանդիսությունների սրահի կողքին:
5500 բնակիչ ունեցող Նոյեմբերյանում հասարակական զուգարան չկար, դրա կառուցումը քաղաքապետ Վանուշ Ամիրաղյանի նախընտրական ծրագրերից է: Նոյեմբերյանում «զուգարանային հակամարտությունը» չի ավարտվում: Սամվել Գիշյանը հայցով դիմել է ՀՀ վարչական դատարան,որով վիճարկում է Նոյեմբերյանում հասարակական զուգարան կառուցելու համար քաղաքապետարանի կողմից տրամադրված շինթույլտվության օրինականությունը: ՀՀ վարչական դատարանի Սեւանի նստավայրում սույն գործով առաջին նիստը կայացել է մայիսի 15-ին, հաջորդը նշանակված է հունիսի 14-ին:
Կարդացեք նաև
Ոսկան ՍԱՐԳՍՅԱՆ
