«Նախախորհրդարան» քաղաքացիական նախաձեռնության հրավիրած հանրահավաքում կինոռեժիսոր Տիգրան Խզմալյանն էլ դժգոհեց, որ Հայաստանը օկուպացված է. «Վերջին 20 տարիներին երկրի ժողովորդի 50 տոկոսը հեռացել է, երկրի քաղաքների կեսը չկա, գյուղերի կեսը չկա, երկիրը արնահոսում է, ամեն օր ավտոբուսներով, ինքնաթիռով մի գյուղ է հեռանում երկրից, արյունը հոսում է: Եվ երբ ժողովրդին հաջողվում է ընտրություններով իրավիճակ փոխել, ըստ նրա, ժողովրդի վրա կրակում են, պահում օկուպացիան»:
Նրա խոսքերով, օկուպացված երկրներում չի կարող լինել ընդդիմություն, կարող է լինել միայն դիմադրություն: Նա ասաց, որ իրենք ոչ մի կուսակցություն չեն եւ չեն լինի, մինչեւ ժողովուրդը չհաղթի, որովհետեւ կուսակցությունները պառակտում են. «Մենք ձեզ հետ միասին ստեղծելու ենք ոչ թե կուսակցություն, այլ իշխանություն»:
Հետո նա ասաց, որ ժողովուրդն է որոշելու, ոչ թե Ռոբերտ Քոչարյանը, Լեւոն Տեր-Պետրոսյանը կամ մեկ ուրիշը: Նրա խոսքերով, այսօր ժողովրդին թույլ են տվել քվեարկել, բայց դարձյալ հաշվում են իրենք. «Կիսասոված, կիսաազատ, կիսաժողովրդավար, կիսագրագետ, կիսահղի չի լինում, չի լինում կիսաազատություն: Ուրեմն ոչ մեկի երդումներին, աղոթքներին չենք հավատում, հավատում ենք միայն ինքներս մեզ: Թանկացնում են գազը, ընդունելո՞ւ ենք, կո՞ւլ ենք տալու դա: Գազի գինը չէ խնդիրը, համակարգն է խնդիրը»:
Տիգրան Խզմալյանը նշեց, որ այսօր Հայաստանի ժողովուրդը երկու միլիոն է, մեկ քաղաքի չափ, հետո հավելեց, որ մեկ քաղաքի հարց պետք է լուծել եւ լավ ապրել: Նրա խոսքերով, ազգային ազատագրական պայքար է սպասվում հենց այստեղ՝ Ազատության հրապարակում, պայմանագրեր են կնքվելու ժողովրդի հետ:
Կարդացեք նաև
Արփինե ՍԻՄՈՆՅԱՆ
