9 անչափահաս երեխաներ ունեցող կինը կրկին հղի է ու երազում է սեփական տան մասին
Երբ այցելեցինք Արմավիր քաղաքի Լերմոնտով փողոցի 47 բնակարան, տանտիկինը զարմացած էր ու շփոթված, քանի որ չէր սպասում, որ հյուրեր կունենա:
Տանտիկինը՝ Գայանեն, ճաշի համար կարտոֆիլ էր մաքրում, իսկ տանը այդ պահին գտնվող չորս երեխաները թանապուր էին ուտում:
Իսկ ընդհանրապես Գայանեն բազմազավակ մայր է՝ ունի 9 երեխա, սպասում է եւս մեկին, որը, հավանաբար, այս ամիս կծնվի:
Կարդացեք նաև
39 տարեկան Գայանեի ամուսինը՝ Դյուման, աշխատանք չունի, տիկնոջ խոսքով՝ տարբեր աշխատանքներ է անում՝ փոս է փորում, փողով խոտ է հնձում կամ հավաքում:
Այս բազմազավակ ընտանիքը սեփական տուն չունի՝ վարձով են ապրում:
«Էրեխեքը շատացան, ամուսնուս հետ հասկացանք, որ քաղաք տեղը հարմար ա էլի, եկանք ստեղ: Նորմալ ապրում ենք՝ ոչ շատ վատ ենք, ոչ շատ լավ»,- Aravot.am-ի հետ զրույցում պատմեց բազմազավակ կինը, ով մինչ Արմավիր քաղաք տեղափոխվելը ամուսնու եւ երեխաների հետ ապրում էր ամուսնու ծնողների մոտ՝ Արագածոտնի մարզում:
«Էսի դիմացի հարեւանի տունն ա, վարձով եկել-ապրում ենք: 13 հազար դրամ ենք տալիս: Եթե հնարավոր ա տուն էլի լինի, թեկուզ սկզբում փոքր, հետո մենք կսարքենք-կմեծացնենք»,-Aravot.am-ի հետ զրույցում այսպիսի ցանկություն հայտնեց բազմազավակ մայրը, ով նաեւ խոստովանեց՝ երբեք որեւէ մեկին չեն դիմել օգնության համար:
Մինչ Գայանեն պատմում էր, թե ինչպես է կարողանում 87 հազար դրամ նպաստով սնունդ գնել, տան վարձն ու այլ կարիքները հոգալ, 3 տարեկան Թամարան
իր քույրերի ու եղբոր հետ անհոգ խաղում էր բակում:
Գայանեի պնդմամբ՝ աղջիկը գլխի վիրահատություն է ունեցել, ու նրան բուժող բժիշկները ասել են, որ փոքրիկին մեկ անգամ եւս պետք է վիրահատեն, այս անգամ՝ ողնաշարը:
Դստեր վիրահատության մասին հազիվ արցունքները զսպող մայրը, սակայն, չի մոռանում իր դեռեւս չծնված երեխայի մասին, որն, ըստ տիկնոջ, տղա է լինելու, ու Հովսեփ են կոչելու:
ԱԺ պատգամավոր Մարգարիտ Եսայանը, լսելով Գայանեի «կյանքի պատմությունը», նրան հանձնեց իր «Գժանոց կամ թեժ աշուն» գրքի հանգանակությունից ստացած 100 հազար դրամ, ինչպես նաեւ՝ հագուստ, խաղալիք ու քաղցրավենիք տան փոքրիկների համար:
«Մեր հետ սենց բան առաջ երբեք չի եղել»,- խոստովանեց Գայանեն ու ասաց.«Ես հավատում եմ Աստծո շնորհիվ ա, որ սենց բարի մարդիկ են հանդիպում»:
Աշոտ ԱԹԱՅԱՆ
