Այսօր «Մեդիա կենտրոնում» Արմավիրի տարածաշրջանում կարկուտի հետեւանքով առաջացած խնդիրների պատճառները եւ լուծումները թեմայով քննարկմանը ներկա էին ՀՀ գյուղատնտեսության փոխնախարար Գառնիկ Պետրոսյանը, ՀՀ արտակարգ իրավիճակների նախարարությանը առընթեր «Մթնոլորտային երեւույթների վրա ակտիվ ներգործության» ՊՈԱԿ-ի տնօրեն Ռոբերտ Հովսեփյանը, ՀՀ ԱԻՆ «Հայպետհիդրոմետի» օդերեւութաբանական կանխատեսման բաժնի պետ Գագիկ Սուրենյանը, Արմավիրում գործող «Գյուղատնտեսական ասոցիացիա» ՀԿ-ի ներկայացուցիչ Լյովա Իսկանդարյանը:
Պետրոսյանի խոսքով` մայիսի 12-ին տեղի ունեցած կարկուտի հետեւանքով ահռելի վնաս է հասցվել, այժմ շարունակվում է եւ հավանաբար կավարտվի համայնքների աշխատանքը, որի արդյունքները կներկայացվի ՀՀ կառավարությանը` առաջարկությունների համար: «Երեկ կառավարության նիստում էլ անդրադարձ է եղել այս խնդրին, առաջնային քայլերն արդեն արվում է, խնդիր է դրվել աջակցել տուժածներին սերմացուների հարցով, քանի դեռ ժամանակահատվածը թույլ է տալիս կատարել կրկնացան, իհարկե պետք է նշեմ, որ բնականաբար այն բերքը չենք ստանա, ինչ առաջին անգամ էր ակնկալվում: Դրանք տրամադրվելու են անվճար եւ անհատույց: Խնդիր կա խաղողի այգիների սեփականատերերի հարցում, այգիներն ահավոր վնասվել են: Այցելել ենք բոլոր համայնքներ, խնդիրը քննարկվել է գյուղատնտեսության նախարարությունում: Այս պահին լուրջ քայլեր են ձեռնարկվել սերմացուների հետ կապված: Առաջարկություն ենք ներկայացրել համայնքներին՝ ներկայացնել իրենց առաջարկություններն առկա խնդրիների լուծման վերաբերյալ: Նշեմ, որ սրությամբ բարձրացվում են վարկերի հետ կապված խնդիրները, մարդիկ խնդիր են դրել երկարաձգել ժամկետները, կասեցնել տոկոսները ու այս խնդիրները պետք է քննարկվեն»:
Իսկանդարյանը հավելեց, որ փորձում են ներկրել սերմեր, բայց իրեն անհանգստացնում է դրանց որակը` «հետաքրքիր է ինչ սերմեր են ներկրում, որտեղից: Եթե օրինակ՝ ես մեկ հեկտար լոլիկ էի ցանել ու այն փչացել է, ապա չգիտեմ, թե այդ ինչ սերմ պետք է ցանեմ նորից, որ ստանամ այնքան լոլիկ, որքան որ պետք է ստանայի առաջին սերմացուից»: Իսկանդարյանը առաջացած խնդիրներից առանձնացրեց վարկերի հարցը:
Պետրոսյանի խոսքով`սերմացուների հարցում օգտագործողները կարող են անհոգ լինել, որովհետեւ դրանք ձեռք է բերվում մեր հանրապետությունում գործող սերմերի ներկրմամբ զբաղվող տնտեսվարող սուբյեկտներից, որոնցից հենց ձեռք էին բերում գյուղացիները. «Սերմացուների հարցում մտահոգություն չի կարող լինել, իսկ ինչ վերաբերում է դրսի սերմացուներին, ապա դրանք եւս խնդիրներ չեն առաջացնի: Խաղողի եւ պտղատու այգիներում լուրջ անելիքներ կան, իսկ մենք պետք է վաղվա` այսինքն եկող տարվա բերքի հիմքը այսօրվանից դնենք, արագ միջոցներ պետք է ձեռնարկենք: Շատերի մոտ կարծիք կա, որ պետք է վնասված վազը կտրել ու չորս տարի սպասել, բայց ես դրան դեմ եմ, որովհետեւ լուծումներ կան»:
Կարդացեք նաև
Սուրենյանն էլ ավելացրեց, թե դեռեւս մայիսի ութին նախատեսված էր, որ լինելու է կարկուտ, սակայն կարկտային պրոցեսները բարդ են տեղայնացված, եւ դրանք կանխատեսել հնարավոր չէ:
Հովսեփյանի խոսքով էլ` «ՀՀ ԱԻՆ համակարգում ներառված են 154 հակակարկտային կայաններ, պաշտպանության տակ է գտնվում 13 հազ հա տարածք»:
Պետրոսյանը խոստացավ` «Մոտավորապես 24 տոննա սերմացու գյուղացիներին կառավարության կողմից կտրամադրվի անհատույց, իսկ վարկերի խնդիրն օրակարգում է եւ ուշադրության կենտրոնում:
Եվա ՀԱԿՈԲՅԱՆ
