Այսօր «Տեսակետ» ակումբում ազատամարտիկներ Ստեփան Ստեփանյանը, Վոլոդյա Ավետիսյանը (նստացույցի կազմակերպիչ), Վարդգես Սմբատյանը (Ռեմբո), Կարեն Մելիքբեկյանը եւ այլք` խոսեցին ազատամարտիկների բողոքի ու իրենց հետագա քայլերի մասին:
Ավետիսյանի ներկայացմամբ` տեսնելով իր ընկերների ապրելակերպը, որոշեց նստացույցով հանդես գալ`«Նամակ հանձնեցինք կառավարությանը, ուզում ենք արժանապատիվ ապրել, մենք ոչ մեկից ողորմություն չենք մուրում, պետությունը պետք է լինի մեր հովանավորը, ոչ թե բարեգործները: Պետությունը պետք է իր պարտականությունները կատարի»:
Մելիքբեկյանի խոսքով` իրենց ներկայացրած պահանջները վերաբերում են բոլոր ազատամարտիկներին. «Մարդիկ անտուն են ապրում, իսկ ով էլ տուն ունի՝ սարսափելի վիճակում է ապրում: Վիրավորական է, մենք մեր երկրում ճնշված ենք ապրում, այնպիսի տպավորություն է, կարծես ուրիշ երկրից ենք եկել, փախստականի կարգավիճակում ենք»:
Ազատամարտիկները նշեցին, որ իրենք առաջ են քաշում հարցեր` կապված ազատամարտիկներին բնակարաններով ապահովելու խնդրով: Նրանք վիրավորական են համարում այն, որ գնում են ինչ- որ տեղ, օրինակ՝ բուժհաստատություններ ու երբ ներկայանում են, որ ազատամարտիկ են, իրենց ասում են՝ «շատ լավ է, որ ազատամարտիկ եք, շնորհակալություն, բայց պետք է վճարեք»:
Կարդացեք նաև
Ստեփանյանն էլ ասաց, որ ինքը ութ տղայի պապիկ է, ապագա զինվորների, սոցիալական վատ վիճակում է, տունը գրավի տակ է, վարկով գումար է վերցրել գյուղատնտեսությամբ զբաղվելու համար ու չի կարողացել վճարել, այժմ խլում են ձեռքից. «Ասում եմ` ավելի լավ է Վարդանաշեն գյուղի տունս էլ ծախեք, ես մի հատ պալատկա կվերցնեմ ու թոռներիս հետ կգնամ քաղաք, իմ 43 հազար դրամ թոշակով կապրեմ, համ էլ գյուղի կարկուտներից կպրծնեմ»: Ստեփանյանը նաեւ նշեց, որ ինքն իր մեդալը չի շպրտել, ըստ նրա` «չէ՞ որ դա տալիս են հայրենիքին մատուցած ծառայության համար, դա սրբություն է»:
Ազատամարտիկները հավաստիացրեցին, որ հետեւողական են լինելու, կառավարությունից` մայիսի 23-ին ստացած պատասխանից հետո էլ կորոշեն, թե ինչ անել:
Բանախոսների ձեւակերպմամբ՝ հաղթած զինվորը չպիտի գլուխը կախ ման գա, կամ` հիսուն դրամ չունենա, իր երեխային բուլկու փող տալու համար: Նրանք համոզված են, որ իրենց խնդիրները նոր չեն առաջացել, դրանք վաղուցվա էին , բայց երբ դիմել են տարբեր հ/կ-ներ, կառույցներ, ՄԻՊ-ին, ասել են` ձեր խնդիրները կապված են ՊՆ-ի հետ, իսկ այնտեղից մերժել են, քանի որ իրենց խնդիրները օգնության պահանջ է եղել:
Եվա ՀԱԿՈԲՅԱՆ
