Այսօր առավոտից կառավարության շենքի առջեւ գազի գնի թանկացումից բողոքող քաղաքացիներին քիչ առաջ ընդունեց Հանրային ծառայությունները կարգավորող հանձնաժողովի նախագահ Ռոբերտ Նազարյանը: Քաղաքացիները կառավարության շենքի մոտից իրենց բողոքի ցույցը շարունակել են հանրային ծառայությունները կարգավորող հանձնաժողովի շենքի դիմաց: Այստեղ նրանց դիմավորեց հանձնաժողովի աշխատակազմի ղեկավարը եւ առաջարկեց երեք ցուցարարների վերեւ բարձրանալ, հանդիպել հանձնաժողովի նախագահին, բայց ցուցարարները մերժեցին, պնդեցին, որ հանդիպմանը պետք է ներկա լինեն նաեւ լրագրողները:
Բանակցելուց հետո ընդառաջեցին ցուցարարների առաջարկին եւ հանդիպումը տեղի ունեցավ լրագրողների ներկայությամբ: Պարոն Նազարյանը տեղեկացրեց, որ գազի գնի բարձրացման հայտ է ստացվել եւ բարձրացման չափը որոշվելու է քննարկման արդյունքում: «Բայց որ գազի գինը բարձրանալու է՝ հաստատ է»,- ասաց նա, բացատրելով, որ սահմանի վրա ռուսական կողմն արդեն բարձրացրել է՝ 170 դոլարի փոխարեն 270 դոլար դարձնելով:
Այս պահին ցուցարարները շարժվում են դեպի Բաղրամյան 26՝ իրենց բողոքի ցույցը շարունակելու նախագահական նստավայրի դիմաց:
Արփինե ՍԻՄՈՆՅԱՆ
