Այսօր «Նոյյան տապան» ակումբում «Ժառանգություն» կուսակցության վարչության անդամ Անահիտ Բախշյանն իր մտահոգությունը հայտնեց կրթական վարձավճարների բարձրացման հետ կապված: Նա ասաց, որ Մանկավարժական համալսարանի խորհրդի կազմում է, եւ գիտի, որ բյուջեն արդեն քննարկվել ու հաստատվել է: Հաստատվել է նաեւ պետհամալսարանի բյուջեն նախագահական ընտրություններից առաջ: Տիկին Բախշյանը հիշեց, որ բյուջեի հաշվետվությունը ողջունել է նաեւ ՀՀ նախագահը. «Ասեց, որ որեւէ երիտասարդի կրթությունը չպետք է ընդհատվի վարձավճարի պատճառով: Եթե հաշվետվության մեջ դա ներառված լիներ, նախագահը նման բան չէր ասի»:
Ըստ տիկին Բախշյանի, դասախոսներն իսկապես պետք է արժանապատիվ վարձատրվեն, հատկապես այն դասախոսները, որոնք այսօրվա պահանջներին համապատասխան տալիս են գիտելիքներ մեր երիտասարդներին. «Կան դասախոսներ, որոնք ժամավաճառությամբ են զբաղվում, իրենց գրքերը վաճառելով են զբաղվում»:
Թե ինչ հետեւանքներ կլինեն այս թանկացումներից հետո, ըստ տիկին Բախշյանի, առաջին հետեւանքը արտագաղթն է, մեր ժողովուրդն իր ընդվզումը լուռ արտագաղթով է անում. «Ասում է՝ էս երկրում չեմ կարող ապրել, թքում եմ ամեն ինչի վրա եւ գնում եմ»:
Անդրադառնալով Արմեն Աշոտյանի պարզաբանումներին, որ որակյալ կրթությունն ունի իր գինը՝ Անահիտ Բախշյանն ասաց. «Իսկապես լավ կրթությունը շատ թանկ հաճույք է: Լավ կրթություն նշանակում է լուրջ տեխնիկական միջոցներ, համապատասխան կահավորանք, դասապրոցեսն ապահովող թանկ պարագաներ, դասախոսների վերապատրաստում: Այո, սա թանկ հաճույք է, եւ ամբողջ աշխարհում է կրթության վարձավճարը բարձրանում: Իսկապես, եթե ուզում ենք լավ կրթություն, պիտի դրա համար վճարենք, բայց մեր երկրում որտեղից վճարելը անլուծելի խնդիր է: Պետպատվերի համար գումար տալը սպառել է իրեն, այդտեղ է կոռուպցիան: Իմ կարծիքով, այդ արտոնություններից օգտվում են նրանք, ովքեր դրան արժանի չեն: Դա պետք է վերանա»:
Կարդացեք նաև
Հռիփսիմե ՋԵԲԵՋՅԱՆ
