Այսօր Aravot.am-ը «Նոյյան տապան» ակումբում հյուրընկալված «Ժառանգության» ավագանու անդամ Անահիտ Բախշյանից հետաքրքրվեց, թե գազի առաջարկվող գինը եթե հաստատի Հանրային ծառայությունները կարգավորող հանձնաժողովը, Ձեր ընտանիքի օրինակով չե՞ք ասի՝ որքա՞ն էիք վճարում ձմռան ամիսներին գազի համար եւ որքան պիտի վճարեք այս ձմռանը: Նա պատասխանեց, որ իր ընտանիքի օրինակով ազնիվ չի լինի դա հաշվել, որովհետեւ մենակ է ապրում եւ երբ տուն է մտնում, այն ժամանակ է միացնում, դուրս է գալիս՝ անջատում է: Նա բերեց իր աղջիկների տան օրինակը, որ գազի համար վճարում էին 30 հազար դրամ, արդեն վճարելու են 48 հազար դրամ, երբ խեղճերի աշխատավարձը չի բարձրացել: Նա հիշեցրեց. «ՀՀ նախագահը խոստացել է հուլիսից բյուջետային աշխատողների աշխատավարձերը կտրուկ բարձրացնել: Հուլիսը քթներիս տակ է: Բոլոր օլիգարխները՝ «Մարիաննայի» տերը, «Աշտարակի» տերը լուրջ ներդրում են ունեցել ընտրական ծախսերը հոգալու համար: Հիմա պիտի վերականգնեն այդ ծախսերը եւ քերթեն ժողովրդի կաշին հերթական անգամ, անապահով Հայաստան ստեղծեն եւ ապահովեն հերթական արտագաղթը: Անչափ խղճում եմ այս կառավարությանը, որովհետեւ իրենք հաստատ ցույց են տալիս, որ իրենք մտահոգված չեն, բայց ամեն մեկը գիտի, թե անեծքի ինչ տարափի տակ են: Գոնե վարչապետը, որպես քրիստոնյա մարդ, դրանից հաստատ վախենում է, բայց ի՞նչ անի, ո՞նց վերարտադրեն իշխանությունը, եթե ընտրություններին չներգրավեն բոլոր օլիգարխներին՝ իրենց քսակներով:
Հռիփսիմե ՋԵԲԵՋՅԱՆ
