Հուլիսի 1-ից կթանկանան նաև հանքային և բնական ջրերը, հյութերը, գարեջուրը։ Հայաստանում արտադրված կամ ներմուծված այս ապրանքատեսակները, որոնք իրացվում են անմիջական արտադրողի կամ անմիջական ներմուծողի կողմից, ենթակա են լինելու պարտադիր դրոշմավորման։
Կառավարության մայիսի 16-ի նիստի հաստատմանը Պետական եկամուտների կոմիտեն ներկայացրել է «Առևտրի և ծառայությունների մասին» ՀՀ օրենքով պարտադիր դրոշմավորման ենթակա՝ տարայավորված որոշ ապրանքների դրոշմավորման և վերադրոշմավորման կանոնների նախագիծը։
Կանոնակարգը պահանջում է, որ դրոշմապիտակը փակցվի պարտադիր դրոշմավորման ենթակա ապրանքի տարայի կողային մակերեսի կամ տարայի կափարիչի վրա՝ տարայի տեսակից կախված։ Ընդ որում՝ արգելվելու է հաստատված նմուշի դրոշմապիտակների վրա նշագրումներ (կնիքներով, դրոշմակնիքներով կամ այլ կերպ) կատարելը, դրոշմապիտակները կամ դրա մի մասը անթափանց թաղանթներով ծածկելը։
«Առևտրի և ծառայությունների մասին» օրենքում փոփոխություններ և լրացումներ կատարելու անհրաժեշտությունը ՊԵԿ-ը բացատրել է նրանով, որ դրոշմապիտակավորումը հնարավորություն կտա արձանագրել որոշ ապրանքատեսակների շրջանառության իրական ծավալները ու սահմանափակել հարկումից խուսափելու հնարավորությունները։
Դրոշմապիտակների ներդրման ճանապարհով կառավարությունը թեև փորձում է պայքարել ստվերային շրջանառության դեմ, սակայն հաշվի չի առել օրենսդրական մեկ առանձնահատկություն։ «Առևտրի և ծառայությունների մասին» օրենքում սահմանված է, որ 2013թ. հուլիսի 1-ի դրությամբ պարտադիր դրոշմավորման ենթակա ապրանքներ իրացնող անձանց մոտ առկա չդրոշմավորված ապրանքային մնացորդները կարող են իրացվել մինչև 2013թ. դեկտեմբերի 31-ը ներառյալ։
Չնայած օրենսդրական այս բացին՝ պարզ է, որ կանոնակարգը նպաստելու է ստվերի կրճատմանը, ինչը, իր հերթին, հանգեցնելու է գների բարձրացման։ Ստվերի առկայությունը այսօր տնտեսավարողին լրացուցիչ եկամուտներ է ապահովում, և խաղի կանոնների խստացման պայմաններում նույնքան եկամուտներ ստանալու միակ ճանապարհը գների բարձրացումն է։
Արմենակ Չատինյան
«Օրակարգ»
