«Անդամավճարի չափը կորոշենք, էլի դուք հին ձեւով եք գնում: Այսինքն ձեզ թվում է, թե մենք այս 3-4-ով հավաքվել ենք եւ որոշել ենք ամեն ինչ: Չէ, մենք դեռ պիտի քննարկենք՝ ով ինչքան կարող է: Մեր բոլոր հարցերը քննարկվելու են: Չորսս էլ տարբեր տեսակետներ շատ հարցերի վերաբերյալ ունենք, էլ չասած մնացած կուսակցականները»,- ՀՀՇ-ի վերածնման մասին հայտարարությունից հետո Aravot.am-ի հետ զրույցում այսպես պատասխանեց նախաձեռնող խմբի անդամներից մեկը՝ Ալեքսանդր Արզումանյանը՝ մեր հարցին, թե նոր ՀՀՇ կուսակցության անդամավճարի չափը որքան է լինելու:
Նա ասաց, որ տարբեր մոտեցումներ կան. վարչության անդամը կարող է ավելի շատ վճարել, խորհրդի անդամը՝ մի քիչ ավելի շատ: Սանդղակային կարող է լինել՝ շարքային կուսակցականները՝ քիչ կարող են վճարել. «Կարող է կուսակցությունը ֆոնդ ստեղծի, որը անապահով ընտանիքների համար սուբսիդավորի անդամավճարը: Դեռ պետք է մեխանիզմը գտնել, որովհետեւ անշուշտ, ժողովրդի վիճակն այդքան բարվոք չի: Ձեւերը պետք է գտնենք, բայց յուրաքանչյուրը պիտի իմանա, որ իր լուման կա»:
Ալեքսանդր Արզումանյանի մեկնաբանությամբ՝ իրենք թողել են, որ ընդդիմությունը բոլոր այս ընտրությունները անցկացնի. «Հիմա նոր էտապ է սկսվում: Մենք նոր ընտրությունների ենք պատրաստվում: Կմասնակցենք՝ կտեսնենք: Մենք բոլոր ինքնակառավարման մարմինների ընտրություններին էլ մասնակցելու ենք: Մրցակցություն ենք ուզում լինի դաշտում՝ առողջ մրցակցություն»:
Մենք ճշտեցինք՝ նոր ՀՀՇ-ն է՞լ է իր համար թիրախ ընտրել այս «ապօրինի, քրեաօլիգարխիկ ռեժիմի տապալումը», թե՞ պատրաստ եք գնալ համաձայնության՝ Ալեքսանդր Արզումանյանը պատասխանեց. «Ես երկու տարի բանտում եմ նստել՝ իմ այդ տեսակետի համար: Ի՞նչ եք կարծում, ես բանտից դուրս եմ եկել ու որոշել եմ հրաժարվե՞լ իմ այդ պայքարից: Թող նրանք դա անեն, որոնք էդ ժամանակ չգիտեմ ինչով են զբաղվել: Ես իմ ողջ կյանքում պայքարել եմ: 88-ին էլ եմ նստել, 2007-ին էլ եմ նստել, 2008-ին էլ: Հուսանք, որ էլ թույլ չենք տա, որ մարդ նստացնեն: Թույլ չենք տա Հայաստանում քաղաքական հետապնդումներ լինեն»:
Կարդացեք նաև
Հռիփսիմե ՋԵԲԵՋՅԱՆ
Միացեք ՆԱԽԱԽՈՐՀՐԴԱՐԱՆ շարժմանը, եթե Ձեր նպատակները ազնիվ են: