Նախօրեին «Առավոտի» հետ զրույցում անդրադառնալով ԲՀԿ նախագահ Գագիկ Ծառուկյանի այն հայտարարությանը, որ ԲՀԿ-ն չի կարող ընդդիմություն լինել, ՀՀԿ խորհրդարանական խմբակցության ղեկավար Գալուստ Սահակյանը մի տեսակ հեգնանքով նկատել էր, որ Ծառուկյանը վերահաստատեց, որ ԲՀԿ-ն «ընդամենն այլընտրանք է»: «Մեզ համար արդեն տարբերություն չկա՝ ընդդիմություն կլինի, այլընտրանք կլինի: Մեզ համար կարեւորը այն է, որ բոլոր գործընթացներում բոլոր քաղաքական ուժերը մասնակից լինեն»,-ասել էր ՀՀԿ փոխնախագահը:
Այսօր Aravot.am-ի հետ զրույցում ԲՀԿ մամուլի խոսնակ Տիգրան Ուրիխանյանն այդ առիթով ասաց. «Որեւէ մեկը թող չկասկածի, որ «Բարգավաճ Հայաստան» կուսակցությունը, ինչպես մեզանից շատերը բազմիցս ասել են, կոնկրետ իր գործողություններով շարունակելու է հակադարձել, պարտադրել, պահանջել ու վերահսկել: Ընդ որում, մեկ անգամ էլ ընդգծեմ, որ ԲՀԿ-ի պատվերը ձեւակերպված է լինելու ժողովրդի կողմից եւ ոչ թե ինչ-որ տեղերից հրամցվող, ինչ-որ կարգի պարտադրված, արհեստական ձեւակերպումներ: Այդ թեմայով հանրությանն ու լրատվամիջոցներին հուզող բոլոր հարցերին լավագույնս անդրադարձել է ԲՀԿ խմբակցության քարտուղար Նաիրա Զոհրաբյանը :
Երեկ Աբովյան քաղաքում Սուրբ Հովհաննես Մկրտիչ եկեղեցու օծման արարողությանից հետո, հավաքված ժողովուրդը պարզապես «հարձակվեց» եկեղեցու բակում գցված մատաղի սեղանների վրա: Տեսարանը եւ տգեղ էր եւ տխուր, ինչը բավականին շահարկումների ու քննադատությունների տեղիք տվեց: «Ես չեմ պատրաստվում ոչ արդարանալ, ոչ էլ արդարացնել որեւէ մեկին: Դա նշանակում է մեղադրել մեծ թվով մարդկանց, ովքեր ինչ-որ մի պահի, ինչ-որ դրսեւորումներ իրենց թույլ տվեցին»,- ասաց Տիգրան Ուրիխանյանը: Հարցին՝ դա մեր ազգին հարի՞ր պահվածք է, ասաց. «Հարիր էր, թե՝ ոչ, թող մտածեն նրանք, ովքեր ժողովրդին ծանր կացության մեջ են դնում, իրենց վարած քաղաքական, սոցիալ-տնտեսական կուրսով»:
Նելլի ԳՐԻԳՈՐՅԱՆ
Բա ինչ անի խեղճ ժողովուրդը…Սոված են բոլորը,և եթե եկեղեցին ժողովրդինն է,ապա իրենց հալալ քրտինքն են ուտում… Բայց ապրի երկար Գագիկ Ծառուկյանը…: