«Ավանդաբար ամեն տարի Թբիլիսիում մայիսի վերջին կիրակին նշվում է իբրև Սայաթ-Նովայի հիշատակի օր` վարդատոն: Մասնակիցները գալիս են մեկական վարդ դնելու Սայաթ- Նովայի շիրիմին: Վարդատոնի 100 -ամյակի և Սայաթ- Նովայի ծննդյան 300–ամյակին նվիրված միջոցառումները կշարունակվեն»,-այս մասին այսօր «Հայելի» ակումբում ասաց ՀՀ ժողովրդական արտիստ, պրոֆեսոր Թովմաս Պողոսյանը:
Բանախոսի փոխանցմամբ`2005 թ.-ից մայիսի նախավերջին կիրակին «Սայաթ-Նովա» մշակութային միությունը վարդատոնը նշում է նաև Երևանում: Սայաթ- Նովայի հուշարձանի մոտ ոգեկոչման արարողության ընթացքում ելույթներ են ունենում մերօրյա գրողներ, աշուղներ և արվեստագետներ: Այս տարի վարդատոնը և համերգային ծրագիրը Երևանում կանցկացվի մայիսի 19-ին, Թբիլիսիում` մայիսի 26-ին, Ս. Գևորգ եկեղեցու բակում, Սայաթ-Նովայի շիրմի մոտ: Արարողությունն անվարտվելու է ՀՀ Հանրային ռադիոյի Սայաթ-Նովա աշուղական երգի վաստակավոր անսամբլի և գեղարվեստական խմբերի համերգային ծրագրով: «Մեր ժողովուրդը ապրում է սայաթնովյան երգի շնչով: Սայաթ -Նովան մեր հայրենիքն է, մեր ժողովրդի անվան հոմանիշն է»:
Ըստ Պողոսյանի` երբեմն զայրույթով են վերաբերվում, երբ ադրբեջանցիները և վրացիները հայտարարում են, թե Սայաթ- Նովան իրենցն է. «Ես հրճվանք և հաճույք եմ զգում, որ Սայաթ-Նովան այնքան մեծ է, որ վրացիները և թուրքերը ուզում են իրենցը լինի: Երանի նրանք ունենային այնպիսի մեկը, որ ցանկանայինք այն մերը լիներ: Սակայն, Սայաթ- Նովան իր երգերում էլ ասում է, թե ով է թուրքը և որտեղից է գալիս»:
Ժողովրդական արտիստն անդրադառնալով այսօրվա հեռուստաեթերին և Սայաթ-Նովայի երգերի կատարմանը՝ ասաց. «Ամոթ եմ ապրում, երբ տեսնում եմ, թե ինչպիսի աղավաղումներով են երգում Սայաթ -Նովան, խոսքը տեսքստի մասին է, իսկ մեղեդու մասին ասեմ հետևյալը, որ երգում են այնքան, որքան կարողանում են և իրենց կողքին կանգնած «մեկնաբանները» ասում են, թե ներկայացնում են Սայաթ-Նովան նորովի: Չեն ասում, որ այդ խղճուկ կատարողը այդքան է կարողանում երգել, այդքանով ծռմռված ներկայացնել այդ հանճարեղ երգը»,-հավելելով, որ Սայաթ- Նովա երգելը բարդ է, բայց միևնույն ժամանակ պարզ է, եթե գնում ես ծառայելու դրան մաքուր հոգով: «Կարծում եմ, որ պետք է ունենալ ազգային մշակույթի քաղաքականություն և այս հարցով պետք է զբաղվի պետությունը»,-ընդգծեց Պողոսյանը:
Կարդացեք նաև
Քրիստինա ՄԻՐԶՈՅԱՆ
