Մայիսի 15-ին Նոյեմբերյանի բժշկական կենտրոնի 28 աշխատակիցներ, այդ թվում՝ բժշկական կենտրոնի փոխտնօրենը, կրճատվել են աշխատանքից: Նրանց հանձնված գրությամբ հայտնվել է, որ հիմք ընդունելով Տավուշի մարզպետ Ա. Ղուլարյանի 2013թ. մայիսի 14-ի որոշումը, նրանց հաստիքը կրճատվել է:
Նշենք, որ բժշկական կենտրոնի բոլոր աշխատակիցները 2 ամիս առաջ գրավոր զգուշացվել են կրճատման վերաբերյալ: Կրճատված մի խումբ աշխատակիցներ` հիմնականում բուժքույրեր, հանդիպեցին «Առավոտի» թղթակցին եւ դժգոհություններ հայտնեցին՝ ինչո՞ւ են կրճատվել բուժկենտրոնի աշխատանքային տարիքի բուժաշխատողները, իսկ թոշակառու աշխատակիցները ՝ ոչ, ինչո՞ւ կրճատման մասին իրենց նախկինում չի ասվել եւ 2 տարի շարունակ հուսադրել են բարձր աշխատավարձի հեռանկարով, իրենք կրճատ աշխատանքային ռեժիմով աշխատել են ամսական 10-11 հազար դրամ աշխատավարձով, եթե կրճատումներ պիտի արվեին, ինչո՞ւ են իրենց ուղարկել մասնագիտական վերապատրաստման, որի համար յուրաքանչյուրը անձնական միջոցներից նվազագույնը 15 հազար դրամ է ծախսել եւ այլն:
Այս հարցերն ուղղեցինք Նոյեմբերյանի բժշկական կենտրոնի տնօրեն Աշոտ Գյոզալյանին: Նա ասաց, որ բժշկական կենտրոնի հաստիքներն ուռճացված էին, կենտրոնի աշխատակազմը պետք է օպտիմալացվեր: Ա. Գյոզալյանի խոսքերով՝ Տավուշի մարզպետարանում ստեղծվել է մասնագիտական խումբ, որն էլ որոշել է աշխատանքից կրճատվողների ցուցակը:
Նրա վկայությամբ՝ ներկայումս բժշկական կենտրոնը 20 միլիոն դրամ պարտք ունի, հիմնարկը ստիպված է հոգալ դիալիզի միկրոբաժանմունքի հիվանդների ծախսի մի մասը, այդ բաժանմունքի համար ձեռք բերված, ջուր մաքրող սարքավորման գումարը եւ այլն: Ա. Գյոզալյանը հայտնեց, որ Նոյեմբերյանի բժշկական կենտրոնի ձեւավորումից, Ոսկեվանի, Զորականի, Բագրատաշենի բժշկական ամբուլատորիաների առաձնացումից հետո իրենց կողմից սպասարկվող հիվանդների քանակը 16 հազար 500-ից նվազել է 6500-ի, համապատասխանաբար նվազել է նաեւ բուժկենտրոնի ֆինանսավորման չափը: Նոյեբերյանի բժշկական կենտրոնում ներդրվել է ընտանեկան բժշկի համակարգը, ինչի պատճառով նեղ մասնագետներին տրվող գումարների մի մասն անցնելու է ընտանեկան բժիշկներին:
Կարդացեք նաև
Հավելենք, որ Նոյեմբերյանի բժշկական կենտրոնի կրճատված աշխատակիցները մտադիր են պայքարել իրեն իրավունքների համար:
Ոսկան ՍԱՐԳՍՅԱՆ
