Արդարադատության նախարարության «Նուբարաշեն» քրեակատարողական հիմնարկի կալանավոր Մհեր Ենոքյանի «Ես զրուցում եմ քեզ հետ, մարդ» գրքից հետո լույս է տեսել նրա երկրորդ՝ «Զուգահեռ աշխարհում» երկլեզու՝ հայերեն-ռուսերեն գիրքը, որի շնորհանդեսն էր այսօր:
Գրքի վաճառքից գոյացած գումարներով նա իր ուսման վարձն է տալու. 2012թ. նոյեմբերի 29-ին Մհերն ընդունվել է Հայ-ռուսական (Սլավոնական) համալսարանի իրավագիտության ֆակուլտետի հեռակա բաժին:
Մհեր Ենոքյանը դատապարտվել էր 1996թ.-ին՝ մեղադրվելով համակուրսեցու սպանության համար:
Կարդացեք նաև
Գիրքը տպագրվել էր բարերար Նարեգ Հարթունյանի աջակցությամբ: Վերջինը հույս հայտնեց, որ Մհերի հաջորդ գրքի շնորհանդեսը կլինի նրա մասնակցությամբ:
Մհերի մայրը՝ տիկին Վարդուհին, ընթերցեց որդու ուղերձը, որը նա թելադրել էր հեռախոսով. «Ինձ Ձեզնից են հեռացրել: Ինձ պահում են վանդակում: Անտարբերությունն է ծնում զուգահեռ աշխարհ: Մոլորակի վրա բոլորս ցմահի կարգավիճակում ենք: Ես սիրում եմ Ձեզ, որովհետեւ Դուք անտարբեր չեք իմ նկատմամբ: Հուսով եմ՝ ներկա կլինեմ հաջորդ գրքիս հավաքին»:
Ողջ միջոցառման ժամանակ հեկեկում էր նրա բժիշկ հայրը, որը երեք անգամ ինսուլտ է տարել: Նա որդու՝ Հայկի եւ կնոջ օգնությամբ հազիվ տեղաշարժվելով՝ եկել էր մասնակցելու 18 տարի անազատության մեջ գտնվող որդու գրքի շնորհանդեսին:
Ներկա էին բազմաթիվ մտավորականներ, Մհերի փաստաբան Ռոբերտ Ռեւազյանը, իրավապաշտպաններ, Մհերի նախկին խցընկերը՝ Գուրգեն Մարտիրոսյանը, որը ներկայացրեց, թե ինչպես բերվեց Մհերը խուց, ինչպիսին էր նա, լրագրող Զարուհի Մեջլումյանը, որին դատապարտյալը նվիրել է իր այս գիրքը:
Ռուզան ՄԻՆԱՍՅԱՆ
