Այս տարի այնպես է ստացվել, որ թանգարանների միջազգային օրն ու թանգարանային գիշերը համընկել են, այսինքն՝ այս երկու օրերի ընթացքում սովորաբար անցկացվող միջոցառումները կանցկացվեն միայն մեկ օր՝ մայիսի 18-ին՝ թանգարանների միջազգային օրը:
Գաֆեսճէան արվեստի կենտրոնը թանգարանային գիշերվա առիթիվ, ըստ նույն կենտրոնի հանրային կապերի եւ մարկետինգի տնօրեն Լիլիթ Սոխակյանի, երկու նոր ցուցադրություն, երեք կրթական ծրագրեր եւ այլ միջոցառումներ է պատրաստել արվեստասեր հասարակության համար:
«Ցուցադրություններից մեկում կներկայացվի pop-art շարժումը: Թանգարանային գիշերվա համար նաեւ նախատեսել ենք երեք կրթական ծրագրեր»,- այսօր «Նոյյան Տապան» լրատվական սրահում տեղեկացրեց Գաֆեսճէան արվեստի կենտրոնի ներկայացուցիչը:
Aravot.am-ը Գաֆեսճէան արվեստի կենտրոնի հանրային ծրագրերի գծով փոխտնօրեն Աստղիկ Մարաբյանից հետաքրքրվեց, թե ինչու է կենտրոնը այս տարի հատուկ ուշադրություն դարձրել հենց pop-art ուղղությանը:
Կարդացեք նաև
Նա պատասխանեց.
«Ցուցադրության ընտրությունը կապված էր հավաքածուն ներկայացնելու հետ: Այս տարի ուղղակի որոշում կայացվեց հավաքածուից ներկայացնել հենց pop-art շարժումը ներկայացնող արվեստագետների գործերը»:
Ա. Միրաբյանի խոսքով, թանգարանային գիշերվա ժամանակ, բացի pop-art շարժման հայտնի ներկայացուցիչների գործերը ներկայացնելուց, նաեւ կկազմակերպվի կինոդիտում:
Նշենք, որ մայիսի 18-ին Գաֆեսճէան կենտրոնը բաց է լինելու առավոտյան 10:00-ից մինչեւ կեսգիշեր:
Աշոտ ԱԹԱՅԱՆ
