Այսօր «Ելակետ» ակումբում հոգեթերապեւտ, սեքսապաթոլոգ Մարատ Զաքարյանն անդրադարձավ մայիսի 15-ին նշվող ընտանիքի միջազգային օրվան: Խոսելով ընտանիքի մասին, նա շեշտեց, որ չենք կարող անտեսել կոնֆլիկտները. «Չկան ընտանիքներ, որտեղ խնդիրներ չլինեն, բայց այն ընտանիքները, որտեղ շատ են երեխաները, վիճակագրությունը ցույց է տալիս, որ այստեղ կոնֆլիկտներն անհամեմատ քիչ են, գուցե դա պայմանավորված է միմյանց հետ քիչ շփվելով եւ երեխաների հոգսերով ավելի շատ զբաղված լինելով: Ընտանեկան կոնֆլիկտ է առաջանում հիմնականում դավաճանությունից, որոնք մեզ պես տաքարյուն ազգերի մոտ հասնում է ամուսնալուծության, քանի որ այն չի ներվում, երկրորդ տեղում կախվածությունն է խմիչքից, թմրադեղերից, մեծ պատճառ է նաեւ ամուսինների հոգեբանական առաձնահատկությունները եւ այլն»:
Զաքարյանը գտնում է, որ հայ ընտանիքի մոդելը մեզ մոտ փոփոխության է ենթարկվել, սակայն ծնող-երեխա փոխհարաբերություններում հարգանքը պայմանավորված է երեխայի ստացած դաստիարակությամբ ու ասել, թե հարգանքը պակասել է` սխալ կլինի:
«Մինչ ազատ, անկախ Հայաստանը` ընտանիքները դաստիարակվում էին սովետական ձեւով, այժմ նոր բաներ կան, չնայած պատերազմը շատ բաներ հասկացրեց ժողովրդին, բայց դաստիարակության հիմնական ուղղությունը գնաց դեպի ազգային, իսկ շատ դեպքերում` դեպի կոնֆլիկտային իրավիճակների»,- այս կարծիքին է Զաքարյանը: Նա նաեւ հավելեց, թե ամեն մի հարց իր պատասխանն ունի, իսկ կոնֆլիկտային իրավիճակներում պետք է գտնել դրանց լուծումները, եւ որ ամենակարեւորն է, պետք է լինեն զիջումներ:
Եվա ՀԱԿՈԲՅԱՆ
