«Հայ հասարակությունում կան խնդիրներ, որոնք առնչվում են գլոբալիզացիային: Հիմնականում հայ ընտանիքներում իդեալական մոդելին փորձում են հավատարիմ մնալ, այսինքն՝ մի ընտանիքի տակ ապրելով ծնողները, երեխաները, թոռները…»,- այսօր «Հայացք» ակումբում ասաց ազգագրագետ Սվետլանա Պողոսյանը: Ազգագրագետը գտնում է, որ ընտանիքի նկատմամբ ավանդական մոտեցումները պետք է անպայման պահպանել. «Մենք այն ազգն ենք, որ պետք չունենք հատուկ ընտանիքի միջազգային օր նշանակել: Միջանձնային հարաբերությունները հայ ընտանիքներում ավելի ջերմ են, քան այլ հասարակություններում է, բայց դա մեզ չպետք է հանգստացնի եւ մենք պետք է օրինակելի դարձնենք մեր ավանդական մոտեցումները»:
Պողոսյանը գտնում է, որ մենք պետք է զգուշանանք նմանակելուց, քանի որ այն լավ բանի չի հանգեցնի: Բացի այդ` պետք է հնարավորինս պահպանել ավանդականը, մասնավորապես մեծին հարգելու, ավագության սկզբունքը:
Եվա ՀԱԿՈԲՅԱՆ
