Այսօր ՄԱԱ-ում խոսելով կրթության մատչելիությունից, ԿԳ նախարար Արմեն Աշոտյանը հայտարարեց, թե այն լուծված է հատկապես միջնակարգ կրթության մակարդակում: Ինչ վերաբերում է բարձրագույն կրթության ոլորտին, ապա նրա ասելով. «Փարոս» ծրագրում ընդգրկված ընտանիքների ուսանողների համար կառավարությունը առաջարկում է 50-100 % փոխհատուցում…Ոչ մի լավ սովորող ուսանող չպետք է դուրս մնա բուհից»:
Ինչ վերաբերում է կրթության արդյունավետությանը, ապա Արմեն Աշոտյանի ձեւակերպմամբ, պետք է նախեւառաջ մտածելակերպ փոխվի, որպեսզի ծնողը չպայմանավորվի դպրոցի տնօրենի հետ, որ իր երեխան բացակայի դասերից, ուսանողը պատրաստ չլինի կաշառքով քննություն ստանալ կամ գործատուն չվերցնի ծանոթին, բարեկամին, հարեւանին, այլ ընտրի լավ մասնագետին:
Նախարարը կարծում է, որ կրթության ոլորտում պետք ներդրումներ արվեն հենց գործատուների կողմից, մինչդեռ աշխատաշուկան դեռեւս չի կարողանում թելադրել, թե ինչ է անհրաժեշտ իրեն կամ չի ուզում ներգրավված լինել իբրեւ պատվիրատու կողմ:
Նա տեղեկացրեց, որ վաղվանից ստուգումներ են սկսվելու բարձրագույն ուսումնական հաստատություններում, որի նպատակը բուհ փակելը չէ, սակայն ինչ-ինչ անհամապատասխանությունների դեպքում, որեւէ բուհ դրանից ապահովագրված չի լինի: Ի դեպ, եթե նախկինում գործում էր 70 ոչ պետական բուհ, այժմ դրանց թիվը հասել է 35-ի
Կարդացեք նաև
Ուսման վարձերի ավելացման մասին էլ նախարարը նշեց, թե ամեն ինչ թանկացել է, բացի ուսման վարձերից. «Եվ եթե մենք իսկապես ուզում ենք, որ դասախոսների աշխատավարձը եւ կրթության որակը բարձրանա, ուրեմն պետք է ուսման վարձերն էլ բարձրանան»:
Արմեն Աշոտյանը նաեւ հայտարարեց. «Մենք այն բացառիկ կառավարությունն էինք, որ անգամ ճգնաժամի պայմաններում չկրճատեց կրթության ոլորտի բյուջեն, ի տարբերություն ավելի բարեկեցիկ երկրների՝ Նիդերլանդներ, Իտալիա, Գերմանիա, Հունաստան»:
Մանրամասները՝ տեսանյութում
Գոհար ՀԱԿՈԲՅԱՆ
