Քիչ հետո Աբովյան քաղաքում կսկսվի «Բարգավաճ Հայաստան» կուսակցության ղեկավար Գագիկ Ծառուկյանի կառուցած Սուրբ Հովհաննես եկեղեցու օծման արարողությունը: Այստեղ ներկա է քաղաքական դաշտի ողջ էլիտան:
Բացման արարողությանը մասնակցում է նաեւ ՀՀ երկրորդ նախագահ Ռոբերտ Քոչարյանը, որը ժամանել է տիկնոջ հետ: Նրանց դիմավորեց Գագիկ Ծառուկյանը: Պարոն Քոչարյանը չպատասխանեց լրագրողների հարցերին, ժպտալով, աջուձախ բարեւելով քաղաքական գործիչներին, մտավ եկեղեցի: ԱԺ նախկին նախագահ Արմեն Խաչատրյանին դիմելով՝ Ռոբերտ Քոչարյանն ասաց՝ «էլ թազա բաներ չունե՞ք պատմելու»: Հետեւի շարքում կանգնածներից մեկն էլ Ռոբերտ Քոչարյանին հորդորեց՝ մի քիչ շուտ-շուտ երեւացեք:
Ժամանել է նաեւ գործող նախագահ Սերժ Սարգսյանը: Նրան նույնպես դիմավորեց Գագիկ Ծառուկյանը: Վերջիններս արդեն բավականին երկար ժամանակ կանգնած զրուցում են:
Ի դեպ, լրագրողների հետ կարճ զրույցում Գագիկ Ծառուկյանն ասաց, որ նաեւ «Ժառանգության» առաջնորդ Րաֆֆի Հովհաննիսյանին է հրավեր ուղարկել: Հիշեցնենք, որ եկեղեցու բացման արարողությանը հրավիրվել է նաեւ ՀՀ առաջին նախագահ Լեւոն Տեր-Պետրոսյանը: «Եկեղեցին բոլորինն է, հայ ժողովրդինը, բոլորին էլ հրավիրել ենք, բոլորի առաջ Աստծո դուռը բաց է»: Լրագրողներից մեկի հարցին՝ եթե իր հրավերները չընդունվեն՝ ինչպե՞ս կընկալվի, Գագիկ Ծառուկյանն ասաց՝ «Թող իրենք իրենց խղճի առաջ պատասխան տան: Մենք բոլորին հրավիրել ենք»:
Կարդացեք նաև
Aravot.am-ը հետաքրքրվեց՝ արդյոք իր այդ քայլով պարոն Ծառուկյանը ցանկացել է միավորել բոլորին: Պարոն Ծառուկյանն ասաց. «Հետայսու պետք է միավորում լինի, որ հաջողություն, հաղթանակ ու զարգացում լինի»: Մեկ այլ հարցի՝ Ձեր առանցքի շո՞ւրջ է միավորումը լինելու, Ծառուկյանը պատասխանեց. «Ընդհանուր բոլորը իրար հետ պիտի կարողանան միավորվել, քանի որ մեր բոլորի ուզածը մի բան է՝ համերաշխություն, զարգացում, բարեկեցություն»:
Հարցին՝ ԲՀԿ-ն ընդդիմությո՞ւն է լինելու, Գագիկ Ծառուկյանը պատասխանեց, որ ԲՀԿ-ն ընդդիմություն չի կարող լինել, քանի որ 3-4 ընդդիմադիր կուսակցություն կա: Նա ասաց, որ ԲՀԿ-ն արդեն հայտարարել է՝ կողմնակից է նրան, ինչն օգուտ ու ձեռնտու է մեր ժողովրդին. «Մենք այդ սկզբունքով արել ենք ու շարունակելու ենք անել»:
Նա մեկ անգամ եւս կրկնեց, որ քաղաքականության մեջ չի մտել անձնական շահի, քծնանքի համար, այլ երկրի հզորացման ու զարգացման:
Ի դեպ, Սուրբ Հովհաննես եկեղեցու բացման արարողությանը մասնակցում էր նաեւ նախագահ Սարգսյանի փեսան՝ Միքայել Մինասյանը, ով վերջերս նշանակվեց Վատիկանում ՀՀ դեսպան: Պարոն Մինասյանը լրագրողների հարցերին չպատասխանեց, անգամ չցանկացավ հստակեցնել՝ արդյոք այս առիթո՞վ է ժամանել Հայաստան:
Ներկա չէ ԲՀԿ խմբակցության պատգամավոր Վարդան Օսկանյանը:
Նելլի ԳՐԻԳՈՐՅԱՆ
Մի լսեք հետևի շարքերում կանգնած կեղծավորներին: դուք պիտի ընդհանրապես չերևաք: Այդպես ավելի լավ կլինի համ Ձեր համար, համ մեր նյարդերի համար
Իմչքաան ստրկամտություն կա իմ ազգի մեջ: