ԲՀԿ խմբակցության պատգամավոր եւ Երեւանի ավագանու ընտրություններում կուսակցության ցուցակի երկրորդ հորիզոնականը զբաղեցնող Գուրգեն Արսենյանը հրաժարվում է հարցազրույցներից: Aravot.am-ի հետ զրույցում պարոն Արսենյանն ասաց. «Հարցազրույց չկա, ոչ մեկին»: Երբ հետաքրքրվեցինք՝ թե ե՞րբ է նախատեսում հարցազրույցներ տալ, ասաց. «Երբ կհասկանանք, որ խոսելու ժամանակն է»:
Հիշեցնենք, որ Երեւանի ավագանու ընտրություններից հետո մի մինի- հարցազրույցում Գուրգեն Արսենյանն ասել էր, թե իր «միսիան ավարտված է» համարում: Սույն արտահայտությունն առաջացրել էր ԲՀԿ-ականների տարակուսանքը: Այնուհետեւ մամուլում «ԲՀԿ-ում մեր աղբյուրներին» հղումով լուրեր տպագրվեցին, որ մայիսի 5-ից հետո ԲՀԿ-ում խուճապ է: Ավագանու ընտրություններում ԲՀԿ քարոզչության պատասխանատու Նաիրա Զոհրաբյանը հերքել էր այդ լուրերը՝ ասելով, որ նման լուրեր տրամադրողն իրականում ԲՀԿ համամասնական ցուցակի առաջին եռյակում է: Թե հատկապես ո՞վ է, տիկին Զոհրաբյանը չէր հստակեցրել, բայց խոսակցություններ են շրջանառվում, որ խոսքը Գուրգեն Արսենյանի մասին է: Aravot.am-ը ցանկանում էր պարոն Արսենյանից այս հարցերի պատասխանները ստանալ, սակայն պարզվեց, որ դեռ «խոսելու ժամանակը» չէ:
Ի դեպ, ԲՀԿ-ն որոշել է վերցնել ավագանու մանդատները: 17 մանդատով ԲՀԿ-ն կզբաղեցնի երկրորդ տեղը:
Նելլի ԳՐԻԳՈՐՅԱՆ
