«Այն, որ մեզ տվեցին 7 տոկոս, իրական ապացույցն է, որ ռեժիմը մաթեմատիկական ճշգրտությամբ կարող է գրել ցանկացած ուզած թիվ: Բացատրեմ, թե ինչու մեզ տվեցին 7 տոկոս, թեեւ մենք ունեինք 30-35 տոկոսի աջակցություն: Որովհետեւ դուք հասկանում եք, որ ռեժիմի համար որեւէ դժվարություն չէր մի կես տոկոս իջեցնեին մեր տոկոսը եւ մենք չանցնեինք պառլամենտ: Այսինք, տային 6.5 տոկոս: Ինչու են տվել 7՝ պարզ պատճառով, որովհետեւ միջազգային հանրությունը այն ժամանակ, կոնգրեսի 5 տարվա պայքարից հետո, հստակորեն ասել էր այս իշխանություններին, որ եթե կոնգրեսը չանցնի պառլամենտ, ուրեմն մենք այդ ընտրությունները չենք ճանաչի որպես դեմոկրատական: Գնացել են նման գործարքների՝ միջազգային հանրությունը եւ իշխանությունը: Նրանք պնդեցին ընդամենը այդ 7 տոկոսի վրա, եւ իշխանությունը տվեց այդ 7 տոկոսը՝ իր լեգիտիմությունը կնքելու նպատակով: Իսկ այս դեպքում, արդեն միջազգային ճնշում չի եղել, որովհետեւ տեղական ընտրությունները այդքան չեն կարեւորվում միջազգային հանրության կողմից»,- ՀԱԿ պատգամավոր Լեւոն Զուրաբյանը այսպես էր բացատրել, թե ինչու խորհրդարանական ընտրություններին իշխանություններն իրենց 7 մանդատ տվեցին, իսկ ավագանու ընտրություններում՝ ոչ:
Այսօր այս առնչությամբ Aravot.am-ի հետ զրույցում ՀՀԿ փոխնախագահ Գալուստ Սահակյանը պարզաբանեց, որ Լեւոն Զուրաբյանը շատ ճիշտ է. «Այդ 7 հոգիանոց խմբին, շատ ճիշտ է ասում Լեւոն Զուրաբյանը, որ մենք ամագ չենք ունեցել: Միջազգայիններն են ամագ ունեցել»:
Հռիփսիմե ՋԵԲԵՋՅԱՆ
