ՀԱԿ -ը ավագանու ընտրությունների վերաբերյալ իր ներկայացրած դիմումների վերաբերյալ ԿԸՀ-ի որոշումները պատրաստվում է բողոքարկել Վարչական դատարանում, իսկ ընտրախախտումներին վերաբերող առանձին դեպքերով հնարավոր է դատախազություն դիմեն:
Պարոն Խաչատրյանը դժգոհում է, որ ԿԸՀ-ն ու որոշ ընտրատարածքային ընտրական հանձնաժողովներ իրենց հնարավորություն չտվեցին առանձին տեղամասերի արդյունքների վերաբերյալ լիարժեք քննարկումներ կազմակերպել:
«Որոշ տեղամասերում վերահաշվարկ չեղավ հանձնաժողովների օրենքի շրջանակներից դուրս գործունեություն ծավալելու հետեւանքով: Եթե վերահաշվարկի դիմումները շատ էին, նրանք երկու խմբի պետք է բաժանվեին եւ վերահաշվարկ անեին, որ բոլորը բացեին, բայց 8/22 տեղամասում այդ ամեն ինչը չարվեց` առանց որեւէ հիմնավորման»,- դժգոհեց պարոն Խաչատրյանը:
Նրա խոսքերով, եթե վերահաշվարկի իրենց բոլոր դիմումները բավարարվեին, իրենք բացահայտելու էին ընտրախախտումների ամբողջ մեխանիզմը. «Նույն Կենտրոնական ընտրական հանձնաժողովը մերժեց 8/8, 8/9 եւ մի շարք այլ տեղամասերի քվեարկությունների արդյունքները անվավեր ճանաչելու մասին դիմումները… ԿԸՀ-ն ինքնագործունեությամբ է զբաղված եւ հիմա որոշել է Սահմանադրական դատարանի դեր կատարել, փոխանակ կոնկրետ գործով զբաղվի, գնահատականներ է տալիս եւ մեզ զրկում օրենքով մեր իրավունքները պաշտպանելուց»:
Կարդացեք նաև
Նա համաձայն չէ ՀՅԴ-ականների հետ, թե բոլոր ընտրախախտումները տեղամասերից դուրս են միայն կատարվել. «Ներսում էլ կար, հիմա պետք է հասկանանք` ոնց է տեղի ունեցել, որ գրանցամատյան է կորում, մի մարդ լինելով ավագանու թեկնածու, մի քանի տեղամասերում վստահված անձ է լինում»:
Մեր հարցին, թե ինչու ՀԱԿ-ը այդքան քիչ ձայներ հավաքեց, պարոն Խաչատրյանը բացատրեց. « Մթնոլորտն էր պատճառը: Հոգեբանական ահռելի ճնշումներ են կիրառվել ընտրողների վրա, մարդկանց չեն թողել անգամ տեղամաս գնալ, մարդկանց հոգնեցրել են իրենց պահվածքով: Տեսել եք` ովքեր էին հավաքված տեղամասերի բակերում: Ընտրությունների ընդհանուր ֆոնը վկայում է, որ գործ ունենք ոչ թե պետության, այլ խուժանի հետ, այդ խուժանի բոլոր արգելքները հաղթահարել էր պետք ընտրության գնալու համար: Այս ընտրությունները նոր երեւույթ էին: Առաջին գծում էր հայտնվել խուժանը, որը ինքն էր որոշում ` ընտրություններն ինչ ձեւ պետք է անցնեն, իսկ իշխանությունները հետեւում էին այդ խուժանի հրահանգներին »:
Արփինե ՍԻՄՈՆՅԱՆ
