«Մեր փորձը ցույց է տալիս, որ գնաճի և ընտրությունների միջև կա ուղիղ կապ: Յուրաքանչյուր ընտրությունից առաջ գները սառեցվում են, իսկ ընտրություններից հետո ակնհայտ նկատվում է գնաճ»,- այսօր այս մասին «Պոստ Սկրիպտում» մամուլի ակումբում ասաց Հայաստանի սպառողների ասոցիացիա ՀԿ նախագահ Արմեն Պողոսյանը:
Բանախոսն անդրադառնալով հետընտրական թանկացումներին ասաց, որ երկու անգամ դիմել են ՀՀ նախագահի վերահսկողության ծառայությանը, ինչպես նաև այս տարի ապրիլին նամակով դիմել են ՀՀ նախագահին` առաջարկելով անցկացնել ստուգայց հացի և շաքարի որակական և քաշի վերաբերյալ, տալ պարզաբանում. «Մինչև այսօր որևէ արձագանք կամ որևէ պատասխան չենք ստացել: Երկրում սպասվող թանկացումը ուղղակիորեն կապված է ընտրակաշառքի հետ»:
Թեև բանախոսը գնաճը կապում է ընտրությունների հետ, սկսած նախագահական ընտրություններից, այնուամենայնիվ վերջին երեք ամսվա կրտրվածքով չկարողացավ ներկայացնել հստակ որևէ ապրանք, որտեղ գրանցվել է գնաճ: «Վերջին երեք ամսում նկատվում է 7-10% գնաճ, սակայն սա մոտավոր թվեր են»,-ընդգծեց բանախոսը, հավելելով, որ իրենք գնաճի վրա որևէ կերպ ազդել կամ կանխել չեն կարող, այլ պարզապես արձանագրում են:
Քրիստինա ՄԻՐԶՈՅԱՆ
