«Պատերազմի մասնակիցը խնդիր ունի դեղորայքի, սա երկի՞ր է: Հիմա կգան թվով, շարքերով, դատարկամիտները, դատարկ գլուխները կանցնեն, իսկ հաշմանդամը կմնա էլի անդեղորայք: Պատերազմի շատ մասնակիցներ հաշմանդամ են, խնդիր ունեն քայլելու եւ այսօր ոչ մի հնարավորություն չունեն, գամված են անկողնուն»,- այսօր Հաղթանակի զբոսայգում նման կարծիք հայտնեց Հայրենական մեծ պատերազմի հերոսներին հարգանքի տուրք մատուցելու եկած Գուրգեն Եղիազարյանը: Նա դժգոհեց, որ պատերազմի մասնակիցներն անտեսված են եւ պետության ուշադրությունից դուրս են մնացել:
Նրա կարծիքով, մայիսի ինը պատերազմի մասնակիցներին հարգանքի տուրք մատուցելու պաշտոնյաների հերթական բլեֆն է, որ ամեն տարի գալիս են կատարելու. «Պետք է մտածենք՝ ինչ վիճակ է այսօր, 41 թվականի հերոսամարտի մասնակիցները մի բուռ են մնացել, բա պետությունն այսօր էդ մի քանի հարյուր մարդու հավուր պատշաճի օգնության ձեռք չմեկնի՞, սրանց համար էդ պատերազմը խորթ է»:
Պարոն Եղիազարյանը նաեւ շարունակեց. «Աստված չանի, որ պատերազմ լինի: Բայց մենք այսօր անվտանգության խնդիր ունենք չլուծված: Հայաստանը դատարկվում է, հայաթափվում է: Աննորմալ ընտրություններով, թաղային հեղինակություններով, կեղծիքներով, բոշաներով ընտրությունները մի տեղից դուրս են գալու: Աստված չանի, որ դուրս գա սահմանից»:
Արփինե ՍԻՄՈՆՅԱՆ
Բայց երկիրը արդեն զավթված է, գուցե դրանից սկսել;