«Հարգելի Դավիթ Սարիբեկյան, մայիսի 9-ը Հաղթանակի եւ խաղաղության տոն է, որը ողջ հայ ժողովուրդը նշում է հաղթանակած մարդու արժանապատիվ հպարտությամբ: Շնորհավորում եմ Ձեզ Հայրենական մեծ պատերազմում տարած հաղթանակի 67-րդ տարեդարձի առթիվ՝ մաղթելով առողջություն եւ երկար տարիների կյանք»,- անցյալ տարի այսպես է շնորհավորել ՀՊՄՀ ռեկտոր Ռուբեն Միրզախանյանը ինձ՝ Հայրենական պատերազմի վետերանիս:
Մայիսի 9-ին, երբ մենք՝ Հայրենական մեծ պատերազմի վետերաններս, թվով հինգ հոգի, գնում էինք Մոնումենտ՝ տոնակատարության, Աբովյանի անվան մանկավարժական համալսարանի ռեկտոր Ռուբեն Միրզախանյանն ամեն մեկիս պարգեւատրում էր 100.000-ական դրամով… Ի դեպ, երբ այն դահլիճում, որտեղ մեր հարգելի ռեկտորը հարցեր էր քննարկում, ներկա էին համալսարանի շատ աշխատողներ: Երբ պարոն Միրզախանյանը պատերազմի վետերաններիցս յուրաքանչյուրին տալիս էր ծրարի մեջ դրված 100.000 դրամը, դահլիճի ներկաները ծափահարում էին: Ես կարծում եմ, որ մեր ռեկտորը այդպես էր վարվում, որ բոլորն էլ իմանային, որ այդ գումարը նա իր գրպանը չի դրել, այլ տվել է պատերազմի վետերաններին: Բայց միաժամանակ ասեմ, որ նախկին ռեկտոր Ղուկասյանը տոնակատարության գնացած պատերազմի վետերաններիս երբեք ոչ մի կոպեկ էլ չէր տալիս:
ԴԱՎԻԹ ՍԱՐԻԲԵԿՅԱՆ
«Առավոտ» օրաթերթ
