ABBA-ի նոր թանգարանում, որը բացվել է Ստոկհոլմում՝ կարելի է պարել, երգել ու նույնիսկ խոսել լեգենդար խմբի մասնակիցների հետ: Ըստ ntdtv.ru-ի՝ ցուցադրված են խմբի բեմական հագուստները, ձայնասկավառակները եւ երաժշտական գործիքները: Կան նաեւ ինտերակտիվ ցուցանմուշներ: Մասնավորապես՝ դաշնամուր, որը միացված է խմբի անդամ Բյորն Ուլվեուսի տան դաշնամուրին, եւ երբ նա սկսում է նվագել՝ այդ մեղեդին հնչում է նաեւ թանգարանում տեղադրված գործիքից:
Կա նաեւ հեռախոս, որի համարն ունեն միայն ABBA խմբի մասնակիցները: Քառյակից յուրաքանչյուրը կարող է ցանկացած պահի զանգահարել այդ հեռախոսով եւ խոսել թանգարանի այն այցելուի հետ, որը կհասցնի առաջինը վերցնել ընկալուչը:
Այստեղ կարելի է անգամ պարել եւ երգել երաժիշտների ողջ հասակով մեկ հոլոգրամների հետ:
Թանգարանի բացմանը ներկա են եղել խմբի բոլոր անդամները, բացի Ագնետա Ֆելթսքոգից:
