Այսօր Հանրային խորհրդի մշակույթի ենթահանձնաժողովի նիստում քննարկվեց «Դվին» հյուրանոցի տարածքում տեղակայված «Լեռնային պար» խմբաքանդակի հարցը: Ելույթով հանդես եկած խմբաքանդակի հեղինակ, քանդակագործ Տիգրան Արզումանյանը, դատապարտելով տեղի ունեցածը, նշեց, որ դեռ ամիսներ առաջ ինքը դիմել էր քաղաքապետարան՝ խմբաքանդակը տեղափոխելու խնդրանքով:
Aravot.am-ի հետ զրույցում նա նշեց, որ քանդակը տեղափոխելու համար այն ժամանակ հարմար տեղ չգտնվեց:
«Հետո կառավարության հետ մշակվում էր օրենսդրական փաթեթ, որ «Դվին» հյուրանոցը պիտի վերակառուցվի, իսկ քանդակը պիտի մնա իր տեղում: Այն ժամանակ ինձ համար դա շատ ավելի հարմար էր, քանի որ տեղափոխելն էլ իր դժվարություններն ունի: Մենք բոլորս էլ, վտանգը զգալով, ուզում էինք, որ քանդակը տեղափոխվի, բայց հարմար տեղ չկար», ասաց նա:
«Լեռնային պար» խմբաքանդակի հեղինակ Տիգրան Արզումանյանը քանդակի հետագա ճակատագրի մասին խոսելիս հույս հայտնեց, որ այն վերանորոգումից հետո էլ կմնա նույն տեղում:
Կարդացեք նաև
«Եթե «Դվին» հյուրանոցի շենքը բարեկարգվի, տարածքն էլ՝ բացվի, ինչու չէ՝ թող մնա նույն տեղում»,-նշեց քանդակագործը:
Աշոտ ԱԹԱՅԱՆ
