Վանաձորցի 26-ամյա Սիման մասնագիտությամբ բուժքույր-մանկաբարձ է:
Արդեն 5-րդ տարին է, ինչ ավարտել է ուսումնական հաստատությունն ու համալրել գործազուրկների շարքերը:
Այսօր Վանաձորում ՀՀ աշխատանքի և սոցիալական հարցերի նախարարության «Զբաղվածության պետական ծառայություն» գործակալության Վանաձորի զբաղվածության մարզային կենտրոնի կազմակերպած աշխատանքի տոնավաճառին նա առաջին անգամ էր մասնակցում:
«Մտածեցի գամ, գուցե կկարողանամ այսպես աշխատանք գտնել, հինգ տարի է, ինչ ավարտել եմ, բայց չեմ կարողանում աշխատանք գտնել»,-Aravot.am-ի հետ զրույցում ասում է նա` տեղեկացնելով, որ չէր հրաժարվի անգամ այլ մասնագիտությամբ աշխատանքից:
Կարդացեք նաև
«Պարտադիր չէ իմ մասնագիտությամբ, կարեւորը աշխատանք ունենամ»:
«Համոզված եմ, որ սա հնարավորություն կընձեռի մեր աշխատանք փնտրողներին եւ գործատուներին, որ լավ, որակյալ մասնագետներ գտնեն:Այսօր խնդիր ունեն ոչ միայն աշխատանք որոնողները, այլ նաեւ մեր գործատուները. որակյալ կադրերի խնդիր ունեն»,-ողջունելով աշխատանքի տոնավաճառի մասնակիցներին` իր խոսքում նշեց Լոռու մարզպետ Արթուր Նալբանդյանը
Տաշիրի կարի ֆաբրիկայի տնօրեն Աղասի Հովհաննիսյանն իր ընկերությունն արդեն 4-րդ անգամ է ներկայացնում Վանաձորում կազմակերպվող աշխատանքի տոնավաճառին:
Կարի ֆաբրիկան 30 եւ ավելի կարող բանվորների կարիք ունի:
«Այս պահին 30 թափուր աշխատատեղ կա, բայց քանի որ մեր աշխատանքը խմբային է, ուստի կարող ենք եւ 60 աշխատատեղ ապահովել»:
Աղասի Հովհաննիսյանի կարծիքով, նման տոնավաճառները օգտակար են:
«Եվ աշխատանք փնտրողն է ծանոթանում պահանջվող աշխատանքներին, եւ գործատուն է հնարավորություն ունենում աշխատող ունենալու»:
Աշխատանքի տոնավաճառին https://www.jobfinder.am ինտերնետային կայքէջի ներկայացուցիչները եւս ասելիք ունեին:
«Այսօր եկել ենք եւ կայքէջի գործունեության մասին տեղեկատվություն տարածելու, եւ մեր գործընկերների ունեցած թափուր աշխատատեղերը ներկայացնելու»,-մեզ հետ զրույցում տեղեկացրեց կայքէջի աշխատակիցը:
Համաձայն կայքում տեղ գտած թափուր աշխատատեղերի հայտարարություններին` առավել պահանջված են ԻՏ եւ բանկային ոլորտի մասնագետները:
«ԻՏ եւ բանկային ոլորտը ներկայացնող հայտարարությամբ աշխատատեղերն են շատ»,-նշում է աշխատակիցը:
2013 թվականի ապրիլի 1-ի դրությամբ, Լոռու մարզում աշխատանք է փնտրում 9131 մարդ: Նրանց թիվը նախորդ տարվա նույն ժամանակահատվածի համեմատ նվազել է 16,9 տոկոսով:
Մարզում գործազրկության մակարդակը 8 տոկոս է:
Անուշ ԲՈՒԼՂԱԴԱՐՅԱՆ
