«Սա այն վայրն է, որտեղ մի տասներկու անգամ առիթ եմ ունեցել մենակ կամ ընկերներիս հետ հանդես գալ, ու հիմա խորհրդանշական է, որ պետք է «Սա ում երկիրն է» տեսահոլովակի շնորհանդեսն էլ այստեղ կայանա»,-այսօր Inrock ակումբում ասաց սիրված երգիչ, երգահան Վահան Արծրունին:
Նա ներկայացրեց իր առաջին պաշտոնական տեսահոլովակը՝ շեշտելով, որ այն նվիրում է հաղթանակի օրվան: Երգը կոչվում է՝ «Սա ո՞ւմ հայրենիքն է»: Խոսքերը Ռազմիկ Դավոյանինն են, երաժշտությունը՝ Վահան Արծրունունը, նկարահանումը՝ Գարեգին Աղաբեկյանինը:
Երգը ստեղծվել է Ռազմիկ Դավոյանի 80-ականներին գրված մի բանաստեղծության հիման վրա եւ մեկն է Վահան Արծրունու այն երգաշարից, որի հիմքում նույնպես Դավոյանի բանաստեղծություններն են։
Արվեստագետը հայտնեց, որ տեսահոլովակը նկարահանված է խրոնիկալ վիդեո ժանրում, այնտեղ ներկայացված է խմբի աշխատանքը ստուդիայում՝ ձայնագրման ընթացքում։ Երաժշտական առանձնահատկություններից մեկն այն է, որ ստեղծագործության մեջ հնչում են բացառապես ակուստիկ գործիքներ։ Նրա ձեւակերպմամբ, երգում գլոբալ աշխարհին հակադրվում է Հայաստանը՝ իր ներքին սահմանների գոյության գերակայությամբ, թեմա, որ ավելի քան հրատապ է մերօրյա իրականության մեջ եւ Շուշիի ազատագրման օրվան ընդառաջ։
Հավելենք, որ Արծրունու խմբի առաջիկա համերգները կկայանան մայիսի 14-ին եւ 27-ին:
Aravot.am-ը Վահան Արծրունուն հարցրեց՝ ի վերջո Հայաստանն ո՞ւմ հայրենիքն է, քրեաօլիգարխիկ տարրերի՞, թե՞ մտածող, հայրենանվեր մարդկանց: «Երգում դա պատասխան չպարտադրող հարց է, յուրաքանչյուր լսող պետք է ինքն իր համար որոշի, որովհետեւ անձամբ ես, որպես արվեստագետ, ունեմ պատասխանը, թե սա ում հայրենիքն է, բայց քանի որ ընդհանուր խեղաթյուրում է տեղի ունեցել արժեհամակարգի եւ հասկացությունների, ինձ թվում է, որ այս օրերին շատ ակտուալ է նման հարցադրումով դուրս գալը արվեստի դաշտ: Հենց սրանով էլ պայմանավորված է այս տեսահոլովակի եւ ձայնագրության նախաձեռնումը»,-ասաց նա:
Կարդացեք նաև
Մեր հաջորդ հարցին, թե ի՞նչ կարծիք ունի այն երեւույթի մասին, որ այսօր ավելի շատ միջակ հնարավորությունների տեր արվեստագետների առաջ են բոլոր դռները բաց, պարոն Արծրունին պատասխանեց. «Դա մի տեսակ դարձել է կյանքի օրենք, երաժշտասերը գրեթե շանս չունի մեդիաներից առնչվել արժեքավոր արվեստներին, արժեքավոր արվեստը, որպես այդպիսին, անհասկանալի կարգավիճակում է մեր երկրում: Դու պետք է կամ անձամբ ճանաչես այդ արվեստագետին, կամ որեւէ փոքր շրջանակի անդամ լինես, որպեսզի կարողանաս առնչվել իր ստեղծած նյութի հետ: Սա, իհարկե, արհեստականորեն ստեղծված իրավիճակ է, որը ձեւավորվել է վերջին քսան տարիների ընթացքում: Հիմա ակումբային շարժումը այն երաշխիքն է, որ արվեստագետ-արվեստասեր շփումը տեղի ուենա, եւ Inrock ու Mezzo ակումբներում իմ համերգները այն իրական հնարավորություններն են, որ ես օգտագործում եմ՝ կապը ունկնդրիս հետ չկորցնելու համար, բայց ընդհանուր դաշտը պառակտված է, սարսափելի: Կա լուրջ արվեստագետների մի ստվար զանգված, որ իսկապես անտեսված է»,-փաստեց Վահան Արծրունին:
Գոհար ՀԱԿՈԲՅԱՆ
Այս երգը ոչ ոք չի հիշի: Երաժշտությունը շատ է գորշ: Էն նարկոման Բոբ Մարլիի ոճով է: Ու՞մն է պետք այսպիսի երաժշտությունը: Այսպիսի երաժշտությամբ կմեռցվի ցանկացած խոսք, եթե նույնիսկ Դավոյանի նման դասականն է խոսքի հեղինակը: