Թիվ 8 ընտրատարածքային ընտրական հանձնաժողովը ավարտեց Մալաթիա-Սեբաստիա վարչական շրջանի աղմկահարույց 8/8 տեղամասի քվեարկության արդյունքների վերահաշվարկը:
Անվավեր ճանաչված 29 քվեաթերթիկներից երեքը քվեարկության արդյունքում վավեր ճանաչվեցին՝ մեկը «Առաքելության», մյուս երկուսը՝ ՀՀԿ-ի օգտին: Այդ քվեաթերթիկների վրա նշումները ընդունված «V» նշանով չէին, այլ՝ «x» եւ թարս «V» նշաններով: Հանձնաժողովի նախագահ Օլեգ Գրիգորյանը պնդեց, որ այդ նշաններով էլ ընտրողն իր հստակ կողմնորոշումը հայտնել է: Նրա հետ չհամաձայնեց «Բարեւ Երեւան» դաշինքի ավագանու թեկնածու Հակոբ Մկրտչյանը՝պնդելով. «Երկակի ստանդարտներ եք կիրառում»:
Օ. Գրիգորյանն էլ հակադարձեց. «Դուք ի՞նչ իրավունք ունեք, ասեք՝ ինչի արեցիք, դուք ասեք՝ լավ չեք արել, սխալ եք արել: Բայց դուք վեճ եք ստեղծում»:
Անվավեր քվեաթերթիկների մեջ կար նաեւ «Մարդ չկա» գրությամբ քվեաթերթիկ:
Կարդացեք նաև
Վերահաշվարկի արդյունքում ԲՀԿ- ի՝ 111, ՀԱԿ-ի՝ 34, ՀՅԴ-ի՝ 38, «Բարեւ Երեւան» դաշինքի՝ 72 , ՀՀԿ-ի՝ 463 եւ ՕԵԿ-ի՝ 57 ձայները մնացին անփոփոխ:
Այսօր ընտրատարածքային ընտրական հանձնաժողովը երեկոյան քննելու է նաեւ ՀԱԿ-ի երկու դիմում՝ անվավեր ճանաչել 8/8 եւ 8/9 տեղամասերի քվեարկության արդյունքները, քանի որ նշված տեղամասում, որպես վստահված անձ է աշխատել ՀՀԿ ավագանու թեկնածու Մեսրոպ Մանուկյանը:
Արփինե ՍԻՄՈՆՅԱՆ
