Հարավկովկասյան տարածաշրջանի ճակատագիրը այսօր վճռվում է Ադրբեջանում, այսօր Բաքվում հայտարարել է Վրաստանի նախագահ Միխեիլ Սաակաշվիլին, հաղորդում է «Ազատություն» ռ/կ-ն:
«Առանց չափազանցության, մեր տարածաշրջանի հետագա ճակատագիրը վճռվում է այստեղ` Բաքվում, Ադրբեջանում: Դա ոչ միայն Ադրբեջանի, այլեւ Վրաստանի, Ուկրաինայի եւ Մոլդովայի, առհասարակ հետխորհրդային երկրների անկախությունն է: Եվրոպայի անվտանգության եւ աշխարհում ազատության ճակատագիրը այժմ վճռվում է այս տարածաշրջանում, մասնավորապես` Ադրբեջանում», – «Թրենդ» լրատվական գործակալության փոխանցմամբ` ասել է Վրաստանի նախագահը:
Պնդելով, թե տարածաշրջանում կան ուժեր, որոնք շահագրգռված են Ադրբեջանում իրավիճակի ապակայունացմամբ, Սաակաշվիլին հավելել է. – «Դա ակնհայտ է, դա հորինված հարց չէ: Մենք դա զգացել ենք մեզ վրա Վրաստանում: Այդ ուժերը կշարունակեն բոլոր ջանքերը, որպեսզի Ադրբեջանում ձեռք բերված առաջընթացը կանգ առնի եւ չշարունակվի»:
Նրա խոսքերով` «Ադրբեջանի զարգացումը չի թողնում հանգիստ քնել նրանց, ովքեր իրենց չեն պատկերացնում առանց կայսերական նկրտումների»:
Կարդացեք նաև
Սաակաշվիլին Բաքվում մասնակցում է «Մադրիդի ակումբ» միջազգային կենտրոնի Հարավկովկասյան ֆորումին: Այսօր նա նաեւ հանդիպել է ադրբեջանցի գործընկեր Իլհամ Ալիեւի հետ:
