«Մշտադիտարկման ենթարկված 7 հեռուստաընկերություններից միայն 6-ի նկատմամբ խտրականություն չի դրսևորվել: Խտրականություն է դրսևորվել Հանրայինի կողմից «Առաքելություն» կուսակցության նկատմամբ»,- այսօր այս մասին «Հենարան» ակումբում ԵՄԱ-ի հրապարակած հեռարձակող մեդիաներում 2013 թվականի Երևանի ավագանու ընտրությունների լուսաբանման մշտադիտարկման հաշվետվության ներկայացման ընթացքում ասաց ԵՄԱ-ի նախագահ Բորիս Նավասարդյանը:
Բանախոսի խոսքով` Հանրային հեռուստաընկերությամբ ցուցադրվող «Հարցազրույց» հաղորդման ընթացքում, այս կուսակցությունից որևէ ներկայացուցիչ երբևէ չի եղել. «Հավանական չեմ համարում, որ հրավիրած լինեին և վերջիններս հրաժարվեին մասնակցությունից: Ամեն դեպքում, մենք կփորձենք սա պարզել: Մնացյալ 6-ի նկատմամբ հիմնական պահանջները ապահոված էին»:
Առավելագույնս լուսաբանվել է «Ժառանգության» և «Բարև Երևան»-ը միասին վերցրած գումարայինով, սակայն իրենց տարբերությունը աննշան է «Բարգավաճ Հայաստան» կուսակցության նկատմամբ. «Եթե վերցնենք ոչ թե եթերային ժամանակի ծավալը, այլ եթերում երևալու հաճախականությունը, ապա այստեղ առաջատարը Հանրապետական կուսակցությունն է»,-ընդգծեց Նավասարդյանը:
Նա նաև նշեց, որ հիմնականում բարձր տոկոսները ձևավորվել են Հանրապետական կուսակցության նկատմամբ և հիմնականում բացասական, որտեղ 28 դրական անդրադարձ և 153 բացասական անդրադարձ է գրանցվել: «Բացասական անդրադարձը հիմնականում ձևավորվել է «Կենտրոն» և «Երկիր Մեդիա» հեռուստաընկերությունների կողմից, քանի որ այս հեռուստաընկերություններում հրավերները չեն ընդունվել: Ստացվում է, որ եթե դու չես գալիս և չես խոսում, ապա քո մասին են խոսում»:
Կարդացեք նաև
Լուսաբանման արդյունքում առաջին տեղում է «Կենտրոն» հեռուստաընկերությունը, երկրորդ տեղում՝ «Երկիր Մեդիան», երրորդ տեղում` «Արմնյուզ» և չորրորդը` «Հ2»:
Ըստ Նավասարդյանի` ավագանու ընտրության ժամանակ իրավապահ մարմինները ավելի հետևողական էին, քան երբևէ, որը պայմանավորված էր սոցիալական ցանցերի ակտիվությամբ:
Բանախոսն անդրադառնալով տեղական և եվրոպական դիտորդական առաքելություն իրականացրած անձանց զեկույցներում առկա տարբերությանը` կապված ավագանու ընտրության հետ, ասաց. «Տարբերությունը եվրոպական և տեղական դիտորդների կայանում էր նրանում, որ այս անգամ եվրոպական դիտորդական առաքելություն իրականացնողները փոքրաթիվ էին և շատ լավ, խորքային չէին կարող տեսնել այն ամենը` ինչպես տեղական դիտորդները»:
Այնուամենայնիվ, բանախոսը կարծում է, որ 3 ընտրություններն էլ նույն որակով և մակարդակով են լուսաբանվել լրատվամիջոցների կողմից: «Միայն եթե համեմատենք 2009 թվականի ավագանու ընտրությունների հետ, ապա այս անգամ լուսաբանումը եղել է շատ ավելի լավ, քան նախորդը»:
Քրիստինա ՄԻՐԶՈՅԱՆ
