Օրերս աղմուկ հանած մեր երկիր ներկրված սերմնահեղուկը ներկրվել է ոչ թե Իսրայելից, այլ Ավստրալիայից, ոչ թե երկու կիլոգրամ, այլ 2 միլիգրամ:
Այսօր «Press Master» մամուլի ակումբում պարզաբանեց «Մոր եւ մանկան առողջության պահպանման գիտահետազոտական կենտրոն»-ի տնօրեն, բժիշկ Գեորգի Օկոեւը:
Հարցին, թե ստացվում է մաքսային ծառայությունը սխա՞լ տեղեկատվություն է տվել ներկրված սերմնահեղուկի վերաբերյալ, բժիշկ Օկոեւն ասաց՝ այո: Ըստ նրա, մաքսայինի նշած սերմնահեղուկի քանակը հավասար է 1200 դոնորի սերմնահեղուկի քանակին, ուստի խոսքը ոչ թե սերմնահեղուկի մասին է եղել, այլ հեղուկ ազոտի, որի մեջ Հայաստանից տեղափոխվել է երկու միլիգրամ սերմնահեղուկը: Այն Ավստրալիայից Հայաստան է ուղարկել մի տիկնոջ ամուսինը՝ կնոջ համար, եւ խոսքն ընդամենը մեկ ընտանիքի մասին է, որի անունը, բնականաբար, չհրապարակվեց. բժշկական գաղտնիք լինելու պատճառով:
Բժիշկ Օկոեւը պարզաբանեց, թե որ դեպքերում է սերմնահեղուկը սառեցվում եւ հետագայում օգտագործվում. «Եթե մարդ, ասենք` չարորակ ուռուցք ունի եւ պետք է ներքին օրգանների եւ ոչ միայն, վիրահատություն տանի, նրա ցանկությամբ սերմնահեղուկը սառեցնում են, որպեսզի անհրաժեշտության դեպքում օգտագործվի առողջ սերմը»:
Ամբողջ աշխարհում, Հայաստանում եւս սերմնահեղուկի բանկ գոյություն ունի, որտեղ դոնորները կարող են հանձնել սերմնահեղուկ՝ համապատասխան վարձատրության դիմաց: Թե ինչ արժե դոնորի ծառայությունը, Գեորգի Օկոեւը չհրապարակեց` ասելով, որ չի ցանկանում սեփական հիմնարկը գովազդել, քանի որ տարբեր կլինիկաներ տարբեր գներ են առաջարկում: Օկոեւը միայն ասաց, որ դոնորից սերմնահեղուկ վերցնելու գործընթացը բուժհիմնարկի վրա նստում է 70 հազար դրամ: Այնպես չէ, որ ով ցանկանա կարող է բանկում սերմնահեղուկ հանձնել, ընդունվում են միայն առողջ տղամարդկանց գենետիկորեն առողջ սերմեր:
Ըստ բժշկի՝ սերմը բանկում կպահպանվի եւ հետագայում կօգտագործվի:
Լուսինե ԲՈՒԴԱՂՅԱՆ
