Հատված ՀՀԿ խմբակցության քարտուղար Հովհաննես Սահակյանի հարցազրույցից:
– Պարոն Սահակյան, ձեզ չի՞ տխրեցնում, թե ՀՀԿ–ի հաղթանակն ինչ ճանապարհով է գրանցվել։ Խոսքը միջադեպերի, խախտումների մասին է, որոնք մամուլն արձանագրել է:
– Իհարկե մտահոգում են էդ միջադեպերը, բայց ես մամուլում տեղ գտած նյութերը բաժանում եմ 2 մասի։ Միգուցե դրանց մի մասը իրականությանը համապատասխանում են, որով անպայման կզբաղվեն իրավապահները, եւ մեր նախընտրական շտաբն էլ է հետամուտ եղել՝ մի շարք ահազանգերի պարագայում, որպեսզի իրավապահ մարմինները զբաղվեն դրանցով։
Մյուս մասը պրովոկացիոն նյութեր էին։
Կարդացեք նաև
– Ես կբաժանեի 2 այլ մասի՝ խախտումներ, կեղծիքներ, եւ այն մշակույթը, որով ՀՀԿ–ի թաղային թիմերը կազմակերպեցին ընտրությունները՝ լկտի պահվածք լրագրողների, դիտորդների նկատմամբ, կուտակումներ, ուղղորդումներ։
– Իսկ որտեղի՞ց է երեւում, որ նրանք հանրապետական են։
– Իրենք են ներկայանում որպես ՀՀԿ-ական։
– Հնարավո՞ր է, որ այդ ամեն ինչը լինի սադրանք, կուտակվեն եւ հետագայում ասեն, որ դրանք հանրապետականներ են։
– Դուք հերքու՞մ եք, որ ԶԼՄ–ների մատնանշած դեպքերում՝ ՀՀԿ–ականներ են միջադեպի մասնակիցները։
– Ես նման բան չասացի։ Ես չեմ հերքում, այլ ասում եմ հետեւյալը. լրատվությունը պետք է օբյեկտիվորեն ներկայացվի։ Չեմ բացառում, որ եղել են խախտումներ։ Իսկ ո՞վ է ասում, որ աշխարհի ամենադեմոկրատական երկրներում չեն լինում նման դրսեւորումներ։ Եկեք հստակ տարանջատենք՝ դա ազդե՞լ է արդյունքների վրա, թե ոչ։ Ես վստահ եմ, որ չի ազդել։ Մյուս քաղաքական թիմերը վերահսկելու հնարավորությունն ունեն։ Նրանք հանձնաժողովներում տեղեր ունեն, վստահված անձեր…Եվ ձեր ասածները՝ կուտակումներ, ուղղորդումներ եւ այլն, ՀՀԿ-ի դեմ սադրանքներ են։ Որքանո՞վ է ընտրողին հաճելի, որ երբ ընտրում դուրս ես գալիս, քո քթից մի քանի մետր հեռավորության վրա տեսախցիկը նկարահանում է քեզ։ Ես չեմ կարծում, որ դա ճիշտ է։
Գագիկ ԱՂԲԱԼՅԱՆ
«Հայկական ժամանակ»
