ԵԽ տեղական եւ տարածքային իշխանությունների կոնգրեսի դիտորդական առաքելության գնահատականներով՝ երեկ Երեւանում անցկացված ավագանու ընտրությունները, չնայած որոշ տեղամասերում գրանցված միջադեպերին, անցել են կանոնավոր եւ տեխնիկապես լավ նախապատրաստված:
Այսօր ասուլիսում առաքելության ղեկավար Ստյուրատ Դիքսոնը նախքան իրենց նախնական գնահատականները ներկայացնելը, խոսեց քաղաքապետերի թեկնածուներից ստացած մտահոգությունների մասին եւ հայտնեց իրենց առաքելության մտահոգությունը: Առաքելության անդամներին մտահոգել են քաղաքապետերի թեկնածուների մտահոգությունները, թե Հայաստանում չբնակվող քաղաքացիներ կան, որոնց անունները միշտ հայտնվում են ընտրողների ցուցակներում.
«Տեղական նշանակության այս հարցին պետք է անդրադառնալ, եւ իշխանությունները պետք է այս հարցին լուծում գտնեն, որ կարողանան խուսափել այս հարցի չարաշահումից: Որոշ հաղորդագրություններ ստացանք այն ճնշման մասին, որ կիրառվում է պետական ծառայողների նկատմամբ, որ քվեարկեն ու համոզեն այլոց, որ այս կամ այն ձեւով քվեարկեն: Մեկ այլ խնդիր , որ բարձրացվեց՝ քվեների գնման հարցն էր: Այս մեղադրանքների առումով կոչ ենք անում Հայաստանի իշխանություններին՝ վերջ դնել այս իրավիճակին, որ կարողանանք ապահովել ընտրական մի միջավայր, որտեղ գոյություն չունի վախի մթնոլորտը եւ կանխիկ գումարի խթանը…Այն խաթարում է քաղաքացիների վստահությունը ընտրական համակարգի հանդեպ»:
Արփինե ՍԻՄՈՆՅԱՆ
