Այսօր կեսօրից ճանապարհային ոստիկանությունը ստուգումներ է իրականացրել Գյումրու միկրոավտոբուսներում` նախ պահանջելով վարորդների փաստաթղթերը, ձեռքի հետ էլ թմրանյութ փնտրելով:
Ըստ մեր տեղեկությունների՝ վարորդներից շատերը տուգանվել են` դուրս հանվելով երթուղուց, շատերն էլ , լսելով այս գույժը, կիսատ էին թողել իրենց աշխատանքն ու հեռացել: Արդյունքում ուղևորները ժամերով սպասում էին որոշ երթուղիների միկրոավտոբուսներին: Օրինակ` 2 ժամ առաջ թիվ 22 երթուղին սպասարկող ոչ մի միկրոավտոբուս չկար Անի թաղամասի Պարույր Սևակ փողոցի վերջնամասում, որտեղ սովորաբար կայանում են այս երթուղու վարոդները:
Իսկ թե ինչու են ստուգումներ իրականացնում հենց միկրոավտոբուսներում, ոստիկանները նախապես տեղեկություններ ունեին այն մասին, որ վարորդներից շատերը աշխատում են առանց փաստաթղթերի, չունեն D կարգի վարորդական իրավունք, առանց որի չի թույլատրվում վարել ավտոբուս կամ միկրոավտոբուս: Ավելին, երեկոյան ժամերին, Գյումրու միկրոավտոբուսները վարում են ով պատահի, հիմնականում անչափահաս ջահելներ` երբեմն ոչ այնքան սթափ վիճակում: Նշենք, որ ըստ որոշ տեղեկությունների, ոստիկանների այս օպերացիան պայմանավորված է նաև նրանով, որ որոշ երթուղիներ դեռ պատկանում են Գյումրու նախկին քաղաքապետ Վարդան Ղուկասյանի գերդաստանին ու շրջապատին: Օրինակ` ասենք 22 երթուղու տերը անմիջապես նախկին պաշտոնյայի որդին է: Ի դեպ, այսօր միկրոավտոբուսների վարորդները վախենում էին կատարել ուղևորների պահանջները ու չէին կանգնում որտեղ պատահի:
Նունե ԱՐԵՎՇԱՏՅԱՆ
Կարդացեք նաև
