Շրջանառության հարկը ստիպո՞ւմ է փոքր բիզնեսով զբաղվողներին լքել երկիրը
2012 թվականին ուժի մեջ մտած շրջանառության հարկն իսկական գլխացավանք է դարձել փոքր եւ միջին բիզնեսով զբաղվողների համար: Այսօր «Ֆորում» ակումբում այսպիսի կարծիք հայտնեց «Վաճառականների միություն» հ/կ-ի նախագահ Ցոլվարդ Գեւորգյանը:
«Երբ նայում ենք 3.5 տոկոսին, թվում է՝ հնարավոր է տալ: Երբ տնտեսագիտական վերլուծություն ենք կատարում, 3.5 տոկոս հարկը շատ ավելի բարձր է, քան ավելացված արժեքի հարկը»,-նշեց Վաճառականների միության նախագահը՝ ասելով, որ չի հասկանում՝ ինչը կարող է ստիպել 12 տարվա մեջ չորս անգամ փոխել փոքր բիզնեսին վերաբերող օրենսդրությունը:
Տիկին Գեւորգյանի խոսքով, շրջանառության հարկի մուծել չկարողանալու պատճառով որոշ տնտեսվարող սուբյեկտներ նախընտրում են լքել երկիրը:
Կարդացեք նաև
«Կառավարությունը հատկապես սահմանամերձ գյուղերում եւ քաղաքներում փոքր բիզնեսը պիտի ազատի հարկերից: Ինչ-որ ժամկետ դնեն՝ երեք տարի, հինգ տարի, ասեն՝ մնացեք աշխատեք, բայց հարկ մի մուծեք»,-այսպիսի առաջարկով հանդես եկավ բանախոսը:
Իսկ տնտեսագետ Թաթուլ Մանասերյանի համոզմամբ, փոքր բիզնեսը պետք է ունենա «թթվածին», որովհետեւ, ըստ նրա, այն հիմք է հանդիսանում միջին եւ մեծ բիզնեսի համար:
«Մենք ամեն մի փոփոխության մեջ պիտի առաջընթաց ունենանք, այլ ոչ թե հարված կամ հետընթաց»,-նշեց տնտեսագետը՝ հավելելով.
«Թող ստվերից բոլորի ականջները քաշեն, բերեն հարկային դաշտ»:
Աշոտ ԱԹԱՅԱՆ
