«Մենք պայքարում ենք հաղթելու համար: Վերջին ընտրությունները ցույց տվեցին, որ ոչ մի կանխատեսման չեն ենթարկվում ընտրությունները: Մենք լավ ձայներ կստանանք, որովհետև ունենք մրցակցային թեկնածու, այդ մասին խոսում են նաև սոցհարցումները»,-այսօր խորհրդարանական ճեպազրույցներում ասաց ՕԵԿ-ական պատգամավոր Հովհաննես Մարգարյանը: Հիշեցնենք, որ Հայաստանի սոցիոլոգիական ասոցացիայի վերջին հարցումների համաձայն, ՕԵԿ-ը վտանգավոր շեմին են:
Լրագրողները հետաքրքրվեցին` ՕԵԿ-ին, որպես կոալիցիոն գործընկերոջ չի՞ հետաքրքրում, թե որտեղից Տարոն Մարգարյանին այդքան հարստություն, այդքան երիտասարդ տարիքում: Հովհաննես Մարգարյանը պատասխանեց. «Յուրաքանչյուր պաշտոնյայի ունեցվածը հետաքրքրում է ոչ միայն մեզ, այլև մեր քաղաքացիներին: Որեւէ կոալիցիա պատասխանատվություն չի կրում որևէ մեկի ունեցվածքի համար»: Մարգարյանն ասաց, որ մրցակից քաղաքական ուժերից մեկը դիմել է պատկան մարմիններին, պատասխանը կլինի`կիմանան:
Նելլի ԳՐԻԳՈՐՅԱՆ
