ԱԺ նախագահ Հովիկ Աբրահամյանը կարգադրել է ԱԺ կայքէջում ինֆորմացիա տեղադրել այն մասին, թե որ պատգամավորներն են մասնակցում նիստերին, որպեսզի «մեր ընտրողները տեսնեն, թե ովքեր ներկա չեն Ազգային ժողովի նիստերին, եւ մյուս անգամ նման պատգամավորներ չընտրեն»։
«ՉԻ» – Փաստորեն՝ Հովիկ Աբրահամյանր լրջորեն կարծում է, թե պատգամավորներին ժողովուրդն է ընտրել: Ավելին, նա կարծում է, թե ժողովուրդը պատգամավորներին ընտրել է, որպեսզի նրանք մասնակցեն նիստերին։ Նման պարզունակ մտածողությունը հեչ պատիվ չի բերում ԱԺ նախագահին, ով, ի դեպ, նաեւ ՀՀԿ նախընտրական շտաբի պետն էր։
Իրականում այդ պատգամավորների մեծ մասին ընտրել անձամբ Սերժ Սարգսյանը, որովհետեւ հենց նա է որոշել, թե ովքեր պիտի լինեն ՀՀԿ ցուցակում եւ ովքեր պիտի առաջադրվեն մեծամասնականով։ Իսկ Սերժ Սարգսյանն այդ մարդկանց ընտրել է բոլորովին այլ չափորոշիչներով, որոնցից հիմնականները երկուսն են. «կողմ» եւ «դեմ» կոճակները արտաքին զննմամբ տարբերելու ունակություն եւ առնվազն մեկ ցուցամատի առկայություն։ Նիստերին մասնակցելու պահանջ, հասկանալի է, չի եղել, այնպես որ՝ Հովիկ Աբրահամյանի զայրույթն անտեղի է։ Իսկ ընտրողներն այսպես թե այնպես այս ԱԺ-ի հետ կապ չունեն։
«Չորրորդ ինքնիշխանություն»
