Հատված Ազգային ժողովի նախագահ Հովիկ Աբրահամյանի հարցազրույցից:
– Իշխանության ներսում խոսում են, որ 2017–18թթ. ընտրություններից առաջ իշխանության ձեր թեւը թուլացնելու փորձ է արվում։
– Ես իշխանության թեւ չունեմ։ Եթե նկատի ունեք կուսակցությունը, մեր այսօրվա թիմը, գոյություն ունի թիմի ղեկավար եւ կուսակցություն, թիմակիցներ եւ յուրաքանչյուր մարդ ունի իր դերակատարությունը այդ կուսակցության, իշխանության մեջ: Ես մամուլում հանդիպել եմ, որ թեւեր կան՝ երիտասարդների թեւ, այս թեւ, այն թեւ, նման թեւեր չկան, դա զուտ բամբասանքներ են։ Միգուցե մարդիկ, որոշ անհատներ կայանալու խնդիր ունեն, բայց դա, իմ կարծիքով, չի կարելի անվանել թեւ։
– Խոսքն այն մասին է, որ իշխանության ներսում արդեն պայքար է սկսվել՝ Սերժ Սարգսյանի իրավահաջորդի համար։
Կարդացեք նաև
– Ես 18 թվականի համար որեւէ պայքար չունեմ անձնապես, որեւէ ցանկություն չունեմ։
– Դուք չե՞ք առաջադրվի։
– Ոչ։ Եւ նման հարց հիմա քննարկելը, իմ կարծիքով, անիմաստ է եւ թիմը միասին կորոշի՝ 17-ին էլ, 18-ին էլ։
– Մյուս թեւը՝ վարչապետի, փորձում է ինքը իրավահաջորդ դառնալ։
– Ես ձեզ հավաստիացնում եմ, չկա…. Ես այդպիսի ցանկություն չունեմ։ Եթե որեւէ մեկը ունի, ակնհայտ կերեւա։ Գոնե ես՝ չունեմ նման ցանկություն։ Իմ կարծիքով, բոլոր լրագրողներն են դա տեսնում, որ որեւէ մեկի վրա հոդված չեմ պատվիրում, որեւէ մեկի վրա պատվեր չեմ իջեցնում, սուտ հերյուրանքներ չեմ տարածում այս անձի, այն թիմակցի, այն քաղաքական գործչի, այն իշխանության ներկայացուցչի մասին։ Թող որեւէ լրագրող ասի, որ Աբրահամյան Հովիկը որեւէ մեկի մասին մի լուր է տարածել կամ ինչ-որ տեղեկատվություն, սուտ հերյուրանք, կամ որեւէ մեկի մասին բան է խոսել։ Ընդհանրապես, եթե ես բան եմ ունենում ասելու, ասում եմ ուղիղ։
Լուսինե ԲԱՐՍԵՂՅԱՆ
«Հայկական ժամանակ»
