Բելառուսն ու Հայաստանը մի շարք համատեղ մշակութային ծրագրեր կքննարկեն: Բանակցությունները կանցկացվեն ապրիլի 30-ից մայիսի 5-ը, Բելառուսում հայկական մշակույթի օրերի ընթացքում: Մայիսի 1-ին «Բելտա» լրատվականին ասել է ՀՀ մշակույթի նախարարի տեղակալ Արթուր Պողոսյանը:
Նախատեսվում է համագործակցել կինոարտադրության ոլորտում, Արամ Խաչատրյանի «Սպարտակ» բալետի համատեղ արտադրության շրջանակներում, Հայաստանում «Art Expo»-ի Բելառուսի մասնակցության հարցում: Կողմերը նախատեսում են քննարկել իրենց համալսարանների համագործակցությունը սերտացնելու հարցը, ինչպես նաև ԱՊՀ ծրագրերը։
Արթուր Պողոսյանը բարձր է գնահատել գրականության թարգմանության համագործակցությունը. «Նախորդ տարի Հայաստանում բելառուս ժամանակակից գրողների բազմաթիվ գրքեր են թարգմանվել հայերեն: Մենք ուզում ենք, որ մեր թե ժամանակակից, թե դասական գրողները թարգմանվեն բելառուսերեն», – ասել է նա:
Ըստ Բելառուսի մշակույթի նախարարի տեղակալ Վլադիմիր Կառաչևսկու, երկու երկրների մշակութային կապերի զարգացմանը ոչ միայն պետությունն է աջակցում, այլև արվեստագետների խմբերը, հասարակական կազմակերպությունները: Նա նշել է, որ երկրները համագործակցում են կանոնավոր կերպով: Հայաստանը մասնակցում է Վիտեբսկում անցկացվող «Սլավոնական բազար»-ին, Մինսկի «Տերևաթափ» (Листопад) միջազգային կինոփառատոնին և «Սպիտակ աշտարակ» (Белая вежа) միջազգային թատերական փառատոնին: Բելառուսը մասնակցում է «Ոսկե ծիրան» միջազգային կինոփառատոնին, «Արամ Խաչատրյան» միջազգային երաժշտական մրցույթին և այլ միջոցառումների:
Կարդացեք նաև
Պատրաստեց Հովհաննես ԻՇԽԱՆՅԱՆԸ
