«Արմմոնո» միջազգային թատերական փառատոնն ամփոփվեց
«Անցյալ տարի մենք համագործակցում էինք Ուրուգվայի դեսպանատան հետ: Այն հետաքրքրությունը, որ կա մոնոներկայացումների նկատմամբ, տարեցտարի աճում է, որի մասին վկայում են լեփ-լեցուն դահլիճները, ինչպես նաև այս տարի երիտասարդների մասնակցությունը փառատոնին աննախադեպ էր»,-այս մասին այսօր Ani Plaza Hotel-ի Press Master մամուլի ակումբում ասաց դերասանուհի, «Արմմոնո» միջազգային թատերական փառատոնի տնօրեն Մարիաննա Մխիթարյանը:
Բանախոսը չցանկացավ առանձնացնել որևէ մեկին կամ լավագույն ներկայացումները, քանի որ փառատոնն իր համար պարզապես տոն է: «Մեր փառատոնին չկար անգամ ժյուրիի անձնակազմ և մրցանակներ, այլ կային ընդամենը նվերներ: Սրանով էլ փառատոնը տարբերվում էր: Այն սպորտ չէ, որտեղ լինի հստակ ժամանակահատված, թույլատերելի և անթույլատրելի արարքներ: Ես դեմ եմ ժյուրիին, ես դեմ եմ մրցանակներին, որովհետև արվեստը շատ սուբյեկտիվ է»,-ընդգծեց Մխիթարյանը:
Դերասանուհին նշեց, որ միշտ էլ փառատոների ընթացքում լինում են ինտրիգներ՝ կապված մրցանակի հետ, սակայն իրենց դեպքում այն լինում է հիմնականում հյուրերի հետ, թե հյուրերն այստեղից ում են հրավիրում այս կամ այն ներկայացմանը. «Ինտրիգան լինում է: Մեր հյուրերը արդեն որոշել և հրավիրել են որոշ ներկայացումներ, սակայն այդ մասին առայժմ ոչինչ ասել չեմ կարող, քանի դեռ չենք ստացել պաշտոնական հրավեր»:
Կարդացեք նաև
Վերջինիս փոխանցմամբ` այս տարի աշնանը Արցախում կանցկացվի ռեգիոնալ փառատոն, որտեղ կհրավիրվեն արտասահմանից հյուրեր: «Մեր հայկական ծրագրերից որոշ բաներ, կարծում եմ, կներկայացվեն Արցախում, սակայն նոր ներկայացումներով հիմնականում հագեցած կլինի փառատոնը»:
Քրիստինա ՄԻՐԶՈՅԱՆ
Ես միանում եմ Մարիաննա Մխիթարյանի կարծիքին, ավելացնեմ, որ այն պետք է վերաբերի արվեստի բոլոր ճյուղերին: Հարգանքով՝ Ա. Բաբայան