Նա պատրաստ է բազմազավակ հայր Տարոն Մարգարյանի հետ այդ հարցում էլ մրցակցել
– Այս ընտրություններում բոլորը ասում են՝ տրանսպորտի հարցը լուծելու ենք, մետրոյի կայան ենք բացելու, այնպիսի խոստումներ են տալիս, որոնք չեն անելու: Հնարավոր չէ՞ այնպիսի խոստումներ տալ, որոնք կարող եք անել:
– Բացարձակ համաձայն չեմ: Ինչո՞ւ չպետք է կարողանանք անել: Ես ապրում եմ6ծայրամասում, եւ ըստ էության պիտի որ տրանսպորտի խնդիր չլիներ, գոնե կարողանայի նստել: Բայց չեմ կարողանում նստել: Բնականաբար, մի ամբողջ քաղաք թեքված վիճակում երթեւեկելու հարցը պետք է լուծվի: Ով եկել է, համակարգն է աշխատեցրել, իսկ համակարգը ստիպում է, որ ռեսուրսները ծառայեցվեն մի քանիսի գերշահույթների համար: Ի՞նչ է, բա՞րդ գործ է մի քանի նորմալ ավտոբուսներ բերել, ոչ թե փոքր եւ սահմանափակ թվով ավտոբուսներ, որպեսզի գերշահույթներ ապահովեն տնտեսվարող սուբյեկտներին, այն դեպքում, որ այդ սուբյեկտներից ոմանք նաեւ քաղաքապետարանում են: Այդ թվում նաեւ Տարոն Մարգարյանը, որը տրանսպորտային ընկերության համասեփականատեր է կամ սեփականատեր: Նույնիսկ այստեղ ակնհայտ է շահերի բախման խնդիրը:
– ՀՅԴ-ն էլ է նույնը ասում, ԲՀԿ-ն էլ, ՀԱԿ-ն էլ, դուք էլ: Ինչի՞ պետք է մարդիկ ձեզ հավատան, որ հենց դուք եք փոխելու:
Կարդացեք նաև
– Որովհետեւ ցանկացած պարագայում մենք այս տարիների ընթացքում լինելով նաեւ պատգամավոր՝ մեր գործունեության ընթացքում երբեւէ հիմք չենք տվել կասկածելու, որ մենք քաղաքացու շահը սպասարկող ենք եղել: Համենայնդեպս, մեր 5 տարվա գործունեությունը դա ապացուցել է: Մենք երբեւիցե իշխանության մեջ չենք եղել եւ անցյալի ծանր բեռ չունենք, երբեւիցե իշխանությունը մեզ չի կարող մեղադրել, ինչպես հիմա մնացածին է մեղադրում, որ ձեր ժամանակ էլ էր նույն տարբերակը:
– ՀՅԴ-ն էլ է ասում, որ անցյալի բեռ չունեն, ունե՞ն:
– Իրենք համագործակցության մեջ են եղել, կոալիցիայի մեջ են եղել, իրենց նկատմամբ եւս տարբեր քննադատություններ են հնչեցվում: Հենց կանաչ գոտիների հետ կապված ասում են՝ Ազատության հրապարակի կողքի սրճարաններն ո՞ւմն են: Այսինքն՝ այնպես չէ, որ իշխանությանը ձեռք չի տալիս այդ քննադատությունը, որովհետեւ իրենք էլ անմիջապես հակադարձում են: Միայն «Բարեւ Երեւան» դաշինքի անդամներին է, որ այդպիսի մեղադրանք չեն կարող հնչեցնել: Առավել եւս, «Բարեւ Երեւան» դաշինքի մեջ կան քաղաքական գործիչներ, որոնք գործունեություն են ծավալել քաղաքական դաշտում, եւ այդ գործունեությունը ի նպաստ երկրի, ի նպաստ քաղաքացու է եղել, որեւէ մեկը կոռուպցիայի մեջ չի եղել, պաշտոն ստանձնելուց հետո չի հարստացել, պատգամավոր են եղել՝ որեւէ ունեցվածք չեն ավելացրել, միայն պակասել է: Այդ տեսանկյունից տարբերությունն ակնհայտ է: Միայն համակարգի հետ չունենալով սերտ կապ՝ հնարավոր է քանդել հին համակարգը եւ կառուցել այն համակարգը, որը քաղաքացուն է ծառայում: Համակարգը փոխելու համար, բնականաբար, մաքուր ձեռքեր են պետք:
– Եթե չստանաք այն ձայները, ինչ սպասում եք, ի՞նչ եք անելու, նորից հանրահավաքնե՞ր, այն ճանապա՞րհն եք բռնելու, ինչ Րաֆֆի Հովհաննիսյանը:
– Նախագահական ընտրությունը բոլորովին այլ կատեգորիա է: Մեր հասարակությունը նախագահական ընտրությունների ժամանակ միավորվում է եւ հստակ իր բողոքի ձայնը բարձրացնում է: Քաղաքապետի ընտրությունները, իհարկե, շատ կարեւոր հանգրվան են, բայց ցանկացած պարագայում չեմ կարծում, որ բողոքի ձայնը մարդիկ բարձրացնեն: Մեր պարագայում մենք համապետական ճգնաժամ ենք տեսնում եւ դրան ուղղված քայլեր ենք ձեռնարկում, ուստի սա չի կարող փոխարինել նրան, որ նոր գործընթացի սկիզբ հանդիսանա: Գործընթացը մեկն է՝ համապետականն է: «Բարեւ Երեւան» դաշինքը ընդամենը այդ գործընթացի մի օղակն է:
– Վահան Հովհաննիսյանն ասում է, որ ընդդիմադիր այն ուժերը, որոնք հայտարարություն չեն անում, որ պատրաստ են հետընտրական դաշինք կազմել, ուրեմն իշխանության հետ առեւտրի դուռը բաց են թողնում: Դուք ինչո՞ւ հայտարարություն չեք անում:
– Ես կարծում եմ՝ մենք արդարանալու կարիք չունենք: Այլ ուժեր պետք է արդարանան, թե ինչու նախագահական ընտրություններին չսատարեցին Րաֆֆի Հովհաննիսյանին՝ գլխավոր քաղաքական պայքարում: Իրենք այդ անգործությամբ նպաստեցին իշխանության վերարտադրությանը: Իրենք թող արդարանան, մենք բացարձակ արդարանալու խնդիր չունենք: Իրենք ամբողջ սիմֆոնիկ ստեղծագործությունը թողած՝ մի հատ «լյա» են ուզում:
– Ի՞նչ ակնկալիքներ ունեք, սեփական հարցումներ արե՞լ եք, քանի՞ տոկոս կստանաք:
– Հարցումներ արել ենք քարոզարշավի սկզբում: Այս մի քանի օրերին նույնպես անցկացվում են, բայց արդյունքները դեռ պատրաստ չեն: Կարծում եմ՝ մեր քաղաքացիները փոփոխություն ցանկանում են եւ մտահոգված են ներկայիս իրավիճակով:
– Մի կարծիք կա, որն անընդհատ շահարկվում է՝ հասարակությունը Արմեն Մարտիրոսյանին քաղաքապետի դերում չի տեսնում: Դուք տեսնո՞ւմ եք Ձեզ այդ դերում:
– Որեւէ քաղաքացու հետ այդքան ժամանակ հանդիպելիս որեւէ մեկը չի ասում՝ պարո՛ն Մարտիրոսյան, ձեզ չեմ պատկերացնում: Այլ հարցադրումներ եղել են՝ վերահսկողության, ծրագրերի հետ կապված, բայց որ ինձ չեն պատկերացնում քաղաքապետ, նման հարցադրում երբեւիցե չի եղել: Ինչպե՞ս են պատկերացնում քաղաքապետին. ծնված օրից մեկի ճակատին կնիք են դնում, որ սա քաղաքապետ է, սա նախարա՞ր է: Գործունեությունը ինքն է բերում դրան: եթե 4 տարի թիմ է աշխատում ավագանիում եւ որեւէ ձեւով չի նպաստում քաղաքացիների սոցիալ-կենցաղային, կոմունալ խնդիրների լուծմանը, բնականաբար ասել, որ այս թիմի այս ներկայացուցիչը հրաշալի քաղաքապետ է, որովհետեւ քաղաքապետ է աշխատել, նշանակում է որեւէ մեկին երբեւէ չպետք է փոխել: Դա տրամաբանության շրջանակում չի տեղավորվում: Եթե քաղաքական գործիչը, որը կուսակցության մեջ ղեկավար դիրքեր է գրավել, կարողանում է կուսակցության աշխատանք կազմակերպել առանց ֆինանսական հնարավորությունների, դե, պատկերացրեք ինչքան աշխատանք կարող է նա կատարել, եթե ինքը լինի կառավարման համակարգում եւ ունենա բավականին մեծ ֆինանսական կարողություններ: Պատգամավորը եւս լայն հնարավորություններ է բացում, մարդիկ միլիոնավոր դոլարներ են ծախսում, որ պատգամավոր դառնան, այնքան կարեւոր պոստ է դա, բայց մենք 5 տարի պատգամավոր ենք եղել, ես նույնիսկ չկարողացա 96թ. Opel մեքենաս մի քանի տարով թարմացնեմ: Նշանակում է՝ եթե ինչ-որ բան ձեռք են բերել, երկու ճանապարհ կա՝ կամ կոռուպցիայով են զբաղվել, կամ գործարար են եղել, այն էլ հրաշք՝ որ կարճ ժամանակահատվածում հարստանում են հարյուրապատիկ անգամ: Ես 2007-ից հայտարարագիր եմ ներկայացրել, որեւէ տող այդ հայտարարագրում չի փոխվել՝ մեկ հողակտոր ունեմ, 1 մեքենա, մեկ հայրական տան համասեփականատեր եմ:
– Մեկ հարցով Դուք Տարոն Մարգարյանին զիջում եք: Նա 5 երեխաների բազմազավակ հայր է: Դուք քայլեր ձեռնարկելո՞ւ եք այս առումով նրա հետ մրցակցելու համար:
– Եթե իմ բնակմակերեսը բավականացնի, որպեսզի ես ավելի շատ երեխաներ ունենամ, բնականաբար՝ կունենամ: Փառք Աստծո, ե՛ւ ես եմ առողջ, ե՛ւ կինս, աղջիկներս էլ շատ գեղեցիկ են:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
